Приемнай дьиэ кэргэннэр ыһыахтаатылар

Бэс ыйын 27 күнүгэр «Ил Эйгэ» сынньалаҥ комплексыгар өрөспүүбүлүкэ приемнай дьиэ кэргэннэрэ ыһыахтаатылар. 
Дьокуускай куорат Олохтоох дьаһалтатын эпиэкэҕэ уонна бэпэчиитэлистибэҕэ департаменын, Дьокуускай куорат приемнай дьиэ кэргэннэрин сэбиэтин уонна Саха Өрөспүүбүлүкэтин приемнай дьиэ кэргэннэрин ассоциациятын көҕүлээһиннэринэн ыытыллыбыт тэрээһин Арассыыйаҕа Дьиэ кэргэн уонна Саха Өрөспүүбүлүкэтигэр Оҕо саас сылыгар ананна.
Приемнай дьиэ кэргэннэр ыһыахтара Саха Өрөспүүбүлүкэтигэр приемнай дьиэ кэргэн статуһун үрдэтиигэ, тулаайах уонна төрөппүт көрүүтэ-истиитэ суох хаалбыт оҕолору иитии хаачыстыбатын тупсарыыга дьоһун болҕомто уурулларын биир көстүүтэ.
Ол курдук ыһыахха 164 оҕолоох 38 приемнай дьиэ кэргэн кытынна. Оттон тэрээһини эстрада ырыаһыта, эпэкиин аҕа Мирослав Егоров иилээн-саҕалаан ыыппыта, «Дьоллоох дьиэ кэргэн» приемнай дьиэ кэргэннэр өрөгөй ырыаларын өрөспүүбүлүкэҕэ киэҥник биллэр Оксана Алексеевна уонна Александр Иванович Павловтар приемнай дьиэ кэргэн Арчылаананы уонна Алгыстаананы кытта ыллаабыттара ураты көстүү буолла.
Бу күн кыргыттарга «Кэрэ Куо», «Уhун суhуох», төрүт аска  «Алгыстаах ас», төрүт таҥаска «Узоры Якутии» күрэхтэр, уолаттарга «Бэргэн оонньуулара», «Хабылык, хаамыска, күөрчэх» күөн күрэстэр ыытылланнар, ыһыах ыалдьыттарын сэҥээриитин ыллылар. 
Спортивнай оонньуулары ыытыыга Олохтоох дьаһалта физическэй култуураҕа уонна спорка управлениета көмөлөстө. 
Кыайыылаахтарга сыаналаах бириистэр, харчынан бириэмийэлэр туттарылыннылар. 
Эһиилги ыһыах Уус Алдан киинигэр Бороҕоҥҥо ыытыллар буолла. СӨ приемнай дьиэ кэргэннэрин ассоциацията онуоха анаан быйылгыттан көһө сылдьар кубогу оҥорон туттарда, диэн иһитиннэрэр Олохтоох дьаһалта эпиэкэҕэ уонна бэпэчиитэлистибэҕэ департамена.