Покровскайдыыр уонна Намныыр аартыктары түөрт балаһалаах суолларынан ситимниэхтэрэ

Ол туһунан Евгений Григорьев «Якутия 24» телеханаал «Якутия. Live» биэриитигэр эттэ. 
«Намныыр уонна Покровскайдыыр аартыктары түөрт балаһалаах Чернышевскай, Хабаров уонна Сэбиэскэй Аармыйа 50 сыла уулуссалар ситимниэхтэрэ. Бүгүҥҥү күҥҥэ Сэбиэскэй Аармыйа 50 сыла уулусса Кальвицаттан Бабушкин уулуссатыгар диэри кэрчигин бырайыак-смета докумуона оҥоһулла сылдьар»,– диэтэ Евгений Григорьев.
Ленин проспегын хапытаалынай өрөмүөнүн туһунан ыйытыыга Евгений Григорьев алтынньы ыйга түмүктэниэҕэ диэн бэлиэтээтэ. Ол курдук, балаҕан ыйын саҥатыгар аспаал үлэтэ түмүктэнэн, тырааныспар сырыыта аһыллыҕа, алтынньы бүтүөр диэри көҕөрдүү үлэтэ, дьоҕус архитектурнай пуормалары, оптуобус тохтобулларын туруоруу түмүктэниэҕэ, диэтэ. 
Оттон Ленин болуоссатын өрөмүөнүн туһунан ыйытыыга реконструкция үлэтэ быйылгыттан номнуо саҕаланаары турарын бэлиэтээтэ.
Ол курдук, Арассыыйа бырабыыталыстыбатын регионнары сайыннарыыга хамыыһыйатын быһаарыытынан федеральнай бүддьүөттэн эбии 267 мөл. солк. кээмэйдээх анал хааһына кирэдьиитэ бэриллибитин туһунан суруйан турабыт. Бу үп чуолаан Дьокуускай куоракка 2024 сылга былааннаммыт 7,3 км усталаах суолу болдьоҕун иннинэ быйыл өрөмүөннээһиҥҥэ туһаҕа тахсар аналлаах. 
Уулусса өрөмүөнүгэр куорат киинэ эрэ болҕомтоҕо ылыллар диэн көрөөччү ыйытыытыгар Евгений Григорьев куорат кытыы нэһилиэктэригэр киинтэн элбэх иэннээх үлэ оҥоһуллубутун бэлиэтээтэ.
«Уулусса-суол ситимин өрөмүөнүн чэрчитинэн куорат территориятын барытын хабарга кыһаллабыт. Ол курдук, «Куттала суох уонна хаачыстыбалаах суоллар» бырайыак үлэлиэҕиттэн 2019 сылтан аҥаардас Мархаҕа 17 км усталаах суол оҥоһулунна, Хатаска – 15 км, Автодорожнай уокурукка – 20 км. Кангалаас бөһүөлэгин сүрүн суоллара барыта нуормаҕа эппиэттиир гына оҥоһулуннулар»,– диэтэ баһылык.
Эпиири сиһилии көрөр сигэ: 

">