Паром сырыыта саҕаланна

Бүгүҥҥүттэн “Дьокуускай-Аллараа Бэстээх” хайысханан паром сырыыта саҕаланна. Билигин ООО «Лентранс», ООО «Первая паромная переправа» уонна «Вторая паромная переправа» 5 парома уу суолугар таҕыста. Паром ахсаана сыыйа-баайа 16-ҕа тиийэ эбиллиэҕэ.

Коронавирус дьаҥа тарҕамматын туһугар, Ил Дархан уурааҕар олоҕуран, паромҥа бэйэ массыынатынан айанныыр көҥүллэнэр. Чугас дьону, дьиэ кэргэни тиэйэ сылдьар бобуллубат.

Маны тэҥэ паромунан онкологическай диагнозтаахтар уонна гемодиализка кэлэр-барар, тимир суол ыстаансыйатыттан айанныыр дьон хааччаҕа суох туһаныахтарын сөп. Айанньыттар бэйэ-бэйэлэриттэн 2 м. тэйиччи туттуохтаахтар.

СӨ сыана бэлиитикэтигэр судаарыстыбаннай кэмитиэтин пресс-сулууспата иһитиннэрэринэн, Дьокуускай уонна Аллараа Бэстээх икки ардыгар пассажирдары уонна тырааныспары таһар паромнар тарыыптара быйыл үрдүө суоҕа.

Дьокуускай уонна Аллараа Бэстээх икки ардыгар паромунан сырыы сыаната: 10-тан аҕа саастаах оҕолорго уонна улахан дьоҥҥо – 122 солк., биэстэриттэн 10-гар диэри саастаах оҕолорго — 62 солк.

Массыыналары таһыы сыаната:

— кыра массыыналар ыйааһыннарыттан көрөн — 340-1 275 солк.;

— 0,5 тоннаҕа диэри ыйааһыннаах таһаҕас массыыналарыгар — 405 солкуобайтан саҕаланар;

— 30 тоннаҕа диэри ыйааһыннаах таһаҕас массыналарыгар — 1 660 солкуобайга диэри;

— пассажирскай автобустарга – 1 535-2 730 солк.;

— мотороллердарга уонна мотоцикларга – 170 солк.;

— контейнердарга – 320-3 085 солк.

Биир тонна таһаҕаһы таһыы ортотунан 340 солкуобай.