Пандемия кэмигэр сөтүө көҥүллэммэт

Роспотребнадзор COVID-19 пандемиятын уодьуганныыр сыаллаах ылыллыбыт миэрэлэригэр этиллэринэн, пляжтары арыйыы бэйэ изоляциятыттан тахсыы эрэсиимин үһүс түһүмэҕэр көҥүллэниэхтээх. Билигин өрөспүүбүлүкэҕэ хааччахтартан тахсыы 1-кы түһүмэҕэ баран эрэр. Ол аата пляжтар официальнайдык аһылла иликтэр, сөтүө көҥүллэммэт.

Халлаан сылыйаатын кытта көҥүлэ суох пляжтарга дьон маассабай сөтүөлээһинэ бэлиэтэнэр. Бу күннэргэ Табаҕаҕа уонна 203 микрооройуоҥҥа ууга былдьана сыспыт дьону быыһаатылар.

Гигиена уонна эпидемиология Саха сиринээҕи салалтата уу уонна кумах боруобатын ылан, анаалыстаатаҕына эрэ сөтүө көҥүллэниэхтээх. Оннук дьаһаллар билигин оҥоһулла иликтэр.

Пандемия хааччахтарын көтүрүү үһүс түһүмэҕэр пляжтар арылыннахтарына, 1,5 м социальнай тэйиччи туттуу, дезинфекциялааһын ыытыллыаҕа, маассабай тэрээһиннэр син биир бобуулаах буолуохтара. СанПиН ирдэбилинэн, пляжка уопсастыбаннай туалеттар, душтар, бөх быраҕар контейнердар, кумаҕы ыраастааһын о.д.а. барыта тэриллиэхтээх. Ирдэбиллэргэ эппиэттиир пляһынан билиҥҥитэ 202 микрооройуон  сөтүөлүүр сирэ эрэ буолуон сөп.

Роспотребнадзор Саха сиринээҕи салаата иһитиннэрэр: көҥүлэ суох сиргэ сөтүөлээһин  доруобуйаҕытыгар уонна олоххутугар кутталлаах!