Ойууру авиациянан харабыллааччылар баһаары утары дэлби тэптэриини туһаныахтара

Региоҥҥа суукка иһигэр 34 ойуур баһаарын умуруордулар, 13 баһаар бохсулунна. Уоту кытта 1800 кэриҥэ киһи уонна 200-тэн тахса тиэхиньикэ охсуһа сылдьаллар. От ыйын 27 күнүттэн ойууру авиациянан харабыллыыр сулууспа Горнай уонна Нам улуустарын икки ардыларыгар дэлби тэптэриини туһаныаҕа. Ол туһунан суһал штаб мунньаҕар нэһилиэнньэ олоҕор куттал суоһаабатын хааччыйар Судаарыстыбаннай кэмитиэт салайааччыта Дмитрий Лепчиков иһитиннэрдэ. 
«Ойуур баһаардарын балаһыанньата билигин даҕаны уустук. Бүгүҥҥү күҥҥэ 135 баһаар баар, уот 1,264 мөл га сири барда. Уопсайа 516 тыһ. га сиргэ 48 баһаары 1806 киһи, 238 тиэхиньикэ умуруора сылдьаллар. Ааспыт сууккаҕа 78 тыһ. га сиргэ 13 баһаар бохсулунна, 352 тыһ. га сиргэ 34 умуруорулунна, 2,8 тыһ. га сиргэ 15 баһаар буола турара эбии булулунна», - диэн иһитиннэрдэ Дмитрий Лепчиков.
Кини бэлиэтээбитинэн, Горнай уонна Үөһээ Бүлүү оройуоннарыгар 4 нэһилиэнньэлээх пуун – Өрт, Маҥарас, Күөрэлээх уонна Кырыкый ураты хонтуруолга сылдьаллар. Арассыыйа ЫБММ авиацията күүскэ үлэлиир, ааспыт сууккаҕа оборона министиэристибэтин танкернай авиацията Үөһээ Бүлүүгэ, БЕ-200 Ньурбаҕа үлэлээбиттэр. Итини сэргэ МИ-8 бөртөлүөттэр Ленскэйгэ, Өлүөхүмэҕэ, Ньурбаҕа уонна Дьокуускай таһыгар үлэлии сылдьаллар. 
«Бүгүҥҥүттэн ойууру авиациянан харабыллааччылар баһаары утары Горнай уонна Нам икки ардыларыгар, Нам өттүттэн дэлби тэптэриини туһанан үлэлиэхтэрэ», - диэтэ Дмитрий Лепчиков.