Ойуурга баһаартан сэрэхтээх буолуҥ

СӨ Ыксаллаах быһыыга-майгыга министиэристибэтин үлэһиттэрэ ойуур баһаарын таһаарбат сыалтан өрөбүл күннэргэ күүһүрдүллүбүт эрэсииминэн үлэлээтилэр. Дьокуускайдааҕы Ойуур хаһаайыстыбатын үлэһиттэрин кытта куорат таһынааҕы ойуурдарга дьон мустан сынньанар сирдэригэр хонтуруоллуур рейдэлэри ыыттылар. 

«Маай бырааһынньыктарын өрөбүллэригэр 400-тэн тахса киһиэхэ сэрэтэр бэсиэдэ ыыттыбыт. Рейдэлэрбит сүрүн сыала - ойуурга баһаары ыыппат курдук дьон сэрэхтээхтик дьаһанан сылдьарын ситиһии. Ойуурга ханнык баҕарар бириэмэҕэ сынньанар көҥүллэнэр, ол эрэн кутаа уоту умаппакка эрэ. Билигин сынньанар сиргэ шашлыгы чоххо буһарар анал миэстэлэр бааллар. Маһынан уматар көҥүллэммэт. Сынньана тахсыбыт дьон мангал тула кыра оҥхой хаһаллара уонна сэрэххэ уоту умуруорарга уулаах буолаллара ирдэнэр», - диэн этэр СӨ Ыксаллаах быһыыга-майгыга министиэристибэтин Кылаабынай управлениетын кэтээн көрөр салаатын инженерэ Леонид Игнатьев. 
Дьокуускай куорат сиригэр-уотугар сынньанарга уонна шашлыктыырга 4 көҥүллэммит миэстэ баарын санатабыт:
Кангалаас микрооройуона – чох тиэйэр кытыл кэннигэр (Өлүөнэ өрүс);
Покровскайдыыр суол 25 км – Табаҕа сэлиэнньэтин таһыгар, Синньигэс күөл хаҥас кытыла;
Намныыр суол 22 км, (Дьокуускай – Нам суол хаҥас өттө);
Покровскайдыыр суол 20 км, (Дьокуускай – Покровскай суол уҥа өттө).