Ойуур баһаарын умуруора байыаннай сулууспалаахтар кэллилэр

Илиҥҥи байыаннай уокурук инженернэй ротатын 120-тэн тахса байыаннай сулууспалаахтара Саха сиригэр ойуур баһаарын умуруора кэллилэр. 
Баһаары умуорууга эбии күүс РФ оборонаҕа миниистирэ, аармыйа генерала Сергей Шойгу сорудаҕынан кэллэ. 
Итини сэргэ нэдиэлэ устата тимир суолунан 16 анал инженернэй тиэхиньикэ, ол иһигэр БАТ-2 (путепрокладчик), бульдозердар, эксватордар, соһор массыыналар (тягач) кэлиэхтэрэ. 
«Тус састаап үөрэммит, үчүгэй бэлэмнээх, байыаннайдар бэйэлэрин соруктарын толороллоругар саарбахтаабаппын», – диир Илиҥҥи байыаннай уокурук инженернэй биригээдэтин хамандыырын солбуйааччы Александр Первушов.
Байыаннайдар ойуур баһаарын умуруора Горнай уонна Үөһээ Бүлүү улуустарыгар бараллар.
Инженернэй биригээдэлэр эйэлээх олоххо сири дэлби тэптэрэр тэриллэртэн босхолууллар, техногеннай саахал тахсыбытын туораталлар, муус устар кэмигэр гидротехническэй тутуулары көрөллөр-харайаллар.