Оттук сезонугар бэлэмнэнии чэрчитинэн киин куоракка уу арахсара былааннанар

«Водоканал» АУо иһитиннэрбитинэн, атырдьах ыйын 11 күнүгэр киэһэ 22.00 чаастан атырдьах ыйын 12 күнүн сарсыарда 07.00 чааһыгар диэри куорат үрдүнэн тымныы уу биэриитэ уонна канализация үлэтэ тохтууллар.  
Ити 2021-2022 с.с. оттук сезонугар бэлэмнэнии өрөмүөнүн кытта сибээстээх. Итини сэргэ,  Кальвица уул., 14, Өктөөп 50 сыла автострада, Богдан Чижик уул., 19 оройуоннарыгар канализация турбаларыгар, 2 №-дээх уу узелыгар өрөмүөн үлэтэ барыахтаах.
Оттук сезонугар бэлэмнэнии чэрчитинэн, 2021 сыл атырдьах ыйын 9-29 күннэригэр Дьокуускайдааҕы ТЭЦ станцията үлэтин тохтотуо. Ол туһунан «Якутскэнерго» ПАУо Дьокуускайдааҕы ТЭЦ иһитиннэрэр. 
Ити тэрилтэ инженернэй салаатын специалистара былааннаммыт тэрээһиннэр куорат олоҕор сабыдыаллыахтара суоҕа дииллэр.