Оттооһун былаана 61% туолла

Бүгүн, атырдьах ыйын 23 күнүгэр ыытыллыбыт мунньахха, Ил Дархан Айсен Николаев Тыа хаһаайыстыбатын министиэристибэтигэр оройуоннарга оттооһун хаамыытын күн ахсын хонтуруоллуурга сорудахтаата. Кини оттооһуҥҥа инники кирбиигэ сылдьар улуустар отторун хаһааналлара, онтон атын оройуоннарга тиэйэллэрэ наадалааҕын бэлиэтээтэ.

«Сүөһү аһылыгын бэлэмнээһиҥҥэ бырабыыталыстыба уонна соҕотуопкалааччылар өттүлэриттэн үлэни тэрийии арыый да мөлтөх. Былырыын Киин, Илин эҥээр уонна Бүлүү бөлөх улуустарыгар ойуур баһаара туран олус ыарахан сыл этэ. Быйыл, улахан баһаар суох кэмигэр, кэккэ оройуоннарга оттооһун хаамыыта бытаан. Ити үлэ тэрийиитэ мөлтөҕүн көрдөрөр. Былырыын баһаар турбут оройуоннара быйыл ууга бараллара, ол иһин ыраах учаастактарга үлэни тэрийиэххэ наадата эрдэттэн өйдөнөр этэ», — диэтэ Ил Дархан.

Быйылгы кыстыкка барыта 443 880 туонна от бэлэмнэниэхтээх. Уу халаанынан сибээстээн оттооһуҥҥа уустук балаһыанньа Үөһээ Дьааҥы, Кэбээйи, Горнай улуустарыгар уонна аһыыкаттан сылтаан Чурапчы оройуонугар үөскээтэ.