От ыйын 2 күнүттэн хааччахтааһынтан тахсыы иккис түһүмэҕэ саҕаланыан сөп

От ыйын 2 күнүттэн Саха сиригэр хааччахтааһын эрэһиимиттэн тахсыы иккис түһүмэҕэ саҕаланыан сөп. Ил Дархан Айсен Николаев брифинигэр иһитиннэрбитинэн, Арассыыйа Роспотребнадзоругар сурук ыытылынна. Көҥүл бэрилиннэҕинэ, от ыйын 2 күнүттэн атыы-эргиэн кииннэрэ, улуустар икки ардыларыгар сылдьар таксилар, сайыҥҥы кафелар үлэлиэхтэрэ.

Ил Дархан кэпсээбитинэн, коронавирус тарҕаныаҕыттан 4223 киһи ыалдьыбыта бэлиэтэннэ. Ааспыт сууккаҕа 45 киһи коронавирустаата. 34 киһи ыарахан туруктаах, онтон 8 киһи тыынар аппаракка  холбонон сытар. Ааспыт сууккаҕа балыыһаттан 179 киһи үтүөрэн таҕыста.

Коронавируһунан ыалдьыы коэффициенэ – 0,7, оттон хааччахтааһынтан тахсарга 0,8 буолуохтаах. Өрөспүүбүлүкэҕэ дьаҥы утары үлэлиир балыыһалар миэстэлэрэ аҥаарынан эрэ туолан турар.

65-тэриттэн аҕам саастаах уонна хроническай ыарыылаах дьоҥҥо, ону тэҥэ Удачнайга уонна Айхалга хааччахтар оннуларынан хаалаллар. Атыы-эргиэн кииннэригэр аһыыр, оҕо оонньуур сирдэрэ үлэлээбэттэр. Пляжтар, сайыҥҥы кафелар, турбазалар үлэлэрэ көҥүллэниэҕэ.

Оттон хааччахтартан тахсыы үһүс түһүмэҕэ от ыйын 15 күнүттэн саҕаланыан сөп.