Остуол оонньууларын чемпионата ыытыллар

Кулун тутар 3-4 күннэригэр киин куорат «Модун» спорт национальнай көрүҥнэрин киинигэр хабылыкка уонна хаамыскаҕа өрөспүүбүлүкэ бастыҥ оонньооччуларын чемпионата ыытыллар.
Күрэхтэһиигэ өрөспүүбүлүкэ улуустарыттан – Үөһээ Бүлүүттэн, Сунтаартан, Бүлүүттэн, Горнайтан, Уус Алдантан, Мэҥэ Хаҥаластан, Тааттаттан, Чурапчыттан, Намтан уонна Дьокуускайтан барыта 100-тэн тахса спортсмен кыттар.
Чемпионат эр дьоҥҥо уонна дьахталларга саастарынан бөлөхтөргө арааран ыытыллар: бастакы бөлөх — 2003-1992 с.т. (дьахталлар, эр дьон); иккис бөлөх: 1991-1982 с.т. (дьахталлар, эр дьон); үһүс бөлөх: 1981-1972 с.т. (дьахталлар, эр дьон); төрдүс бөлөх: 1971-1962 с.т. (дьахталлар, эр дьон); бэһис бөлөх: 1961 с.т. уонна онтон үөһээ (дьахталлар, эр дьон); алтыс бөлөххө маастардар кытталлар. 
Күрэхтэһээччилэр хабылык, 5 хаамысканан тоҥсуур, 7 хаамысканан тоҥсуур, умсаах көрүҥнэргэ күрэс былдьаһаллар. Быраабыла быһыытынан, хас биирдии оонньооччуга иккилии түһүмэх бэриллэр. Биир оонньуу бириэмэтэ — икки мүнүүтэ.
Чемпионат сүрүн судьуйата – Иннокентий Максимов.