11.04.2022 | 13:00

Оскуола-уһуйаан саҥа дьиэтэ арылынна

Оскуола-уһуйаан саҥа дьиэтэ арылынна
Ааптар: Киин Куорат
Бөлөххө киир

Муус устар 9 күнүгэр Кангалаас дьоҕус оройуонугар оскуола-уһуйаан саҥа дьиэтэ арылынна. Үөрүүлээх тэрээһиҥҥэ өрөспүүбүлүкэ Ил Дархана Айсен Николаев уонна куорат баһылыга  Евгений Григорьев кыттыыны ыллылар. П.С.Хромов аатынан үөрэҕирии  тэрилтэтэ 220 оскуола уонна 100 уһуйаан миэстэлэрдээх. Бу туһунан Олохтоох дьаһалта пресс-сулууспата иһитиннэрдэ.
Үгэс быһыытынан үөрүүлээх тэрээһин алгыс сиэриттэн-туомуттан саҕаланна. Ол кэннэ саҥа дьиэ устун ыалдьыттарга экскурсия ыытылынна. Оскуола бары ирдэнэр тэрилинэн хааччыллыбыт. Ол курдук, икки информатика, икки лингафоннай кэбиниэттэр, 121 олорор миэстэлээх остолобуой, 154 миэстэлээх аактабай саала бааллар. Итини сэргэ кылаастарга интерактивнай панель баар. 
Ил Дархан Айсен Николаев оскуола уонна уһуйаан кэлэктииптэрин саҥа дьиэҕэ киирбиттэринэн эҕэрдэлээтэ. 
«Бу түбэлтэ тус бэйэбэр дьоһун суолталаах. Мин Дьокуускай куорат баһылыгынан үлэлиир кэммэр саҥа оскуоланы тутар туһунан быһаарыыны ылыммыппыт. Оччолорго элбэх мөккүөр баара – Кангалааска саҥа оскуоланы тутар наадалаах дуо диэн. Билигин саамай сөптөөх быһаарыы ылыныллыбытын көрөбүт. Кангалаас – хайҕаллаах ааспыт кэмнээх эрэ буолбакка, үтүө-сырдык кэскиллээх бөһүөлэк. Мантан Дьокуускай саҥа индустриализацията саҕаланыахтаах, манна өрөспүүбүлүкэбитигэр бастакы урутуур социальнай-экономическэй сайдыы территорията баар буолбута, ити бырайыак салгыы үүнүөхтээх-сайдыахтаах. Манна тас омук табаарын солбуйар саҥа технологиялар баар буолуохтара», – диэн бэлиэтээтэ Айсен Николаев.
Куорат баһылыга  Евгений Григорьев олохтоохтору үөрүүлээх түгэнинэн эҕэрдэлээтэ уонна өрөспүүбүлүкэ Ил Дарханыгар уонна тутааччыларга махталын биллэрдэ.
«Биһиги уопсай сорукпут Дьокуускай куорат сайдыытын Ыйааҕынан торумнаммыта. Уон сыл иһигэр 17 тыһыынча үөрэнээччи миэстэтин оҥоруохтаахпыт. Саҥа оскуолалары тутуу куорат бүттүүнүн үрдүнэн былааннанар,  ВЭБ.РФ судаарыстыбаннай корпорацияны кытта бииргэ үлэлэһэбит. Итини таһынан, быйыл Хатас уонна Пригороднай сэлиэнньэлэрин оскуолаларыгар, куорат киинигэр  5-с №-дээх оскуолаҕа самалык тутууну арыйыахпыт. Эһиил 26-с уонна 29-с №-дээх оскуолаларга самалык тутуутун саҕалыахпыт. ДСК оройуонугар 990 миэстэлээх оскуола тутуутун саҕалыыбыт, ону сэргэ  Прометей оройуонугар 990 миэстэлээх саҥа оскуола үлэҕэ киирэрин кэтэһэбит», - диэтэ Евгений Григорьев.
Билиҥҥи туругунан Кангалаас орто оскуолатыгар 177 оҕо үөрэнэр. Кэнники сылларга оскуола үөрэнээччилэрэ муниципальнай олимпиадаларга, «Инникигэ хардыы» өрөспүүбүлүкэтээҕи научнай-практическай конференцияҕа көхтөөхтүк кытталлар. Кинилэртэн 26 оҕо олимпиада призердарынан уонна 15 оҕо  лауреаттарынан буоллулар.
2009 сылтан оскуола култуурунай-эстетическэй хайысханан ситиһиилээхтик үлэлиир. Манна «Кристалл» образцовай вокальнай ансаамбыл уонна «Эльф» театральнай кэлэктиип тэрилиннилэр, кинилэр иитиллээччилэрэ араас таһымнаах куонкурустар уонна бэстибээллэр лауреаттарынан уонна дипломаннарынан буолаллар. 
Кангалаас дьоҕус оройуонун уһуйааныгар үс бөлөх үлэлиир, онно 68 иитиллээччи дьарыктанар.
Манна даҕатан эттэххэ, 5 кв. м. тахса иэннээх икки этээстээх саҥа оскуола-уһуйаан дьиэтин тутуута 2019 сыллаахха саҕаламмыта. Социальнай эбийиэк «РФ Уһук Илиҥҥи федеральнай уокурукка экономическэй үүнүү кииннэрин сайдыыта» бырагыраама чэрчитинэн, РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев өйөбүлүнэн тутулунна.

Сонуннар

Ордук ааҕаллар

Былатыан Эверстов:  «Элбэх дьоҥҥо сонуну кэпсиир кыахтаах буолар — дьол»
Дьон | 06.06.2024 | 10:00
Былатыан Эверстов: «Элбэх дьоҥҥо сонуну кэпсиир кыахтаах буолар — дьол»
Хас сир аайы ураты дьон баар буолар. Кинилэр олохторун хара маҥнайгыттан атыннык олоро сатыыллар. Барыларыгар баар курдук нус-хас дьылҕаҕа дураһыйбаттар. Оннук дьикти киһинэн Дьааҥы улууһугар олорор эрээри, өрөспүүбүлүкэ, дойду, аан дойду үгүс бэлиэ спортивнай түгэннэрин көтүппэккэ хамнаһа суох сырдатар суруналыыс, киэҥ сырыылаах айанньыт, коллекционер, фотограф, спортсмен, норуот тапталын ылбыт Платон...
Татьяна Гоголева:  «Төрөөбүт тылын билбэт ыччат ханна да сыаналаммат»
Дьон | 13.06.2024 | 10:00
Татьяна Гоголева: «Төрөөбүт тылын билбэт ыччат ханна да сыаналаммат»
«Хотугу сулус» оҕо телерадиоакадемиятын төрүттээбит, үгүс көлүөнэ талааннаах ыччаты көччөх гынан көтүппүт Татьяна Гоголева, чахчы, Саха сиригэр тыыннаах номох буолбут киһи. СӨ култууратын үтүөлээх үлэһитэ, СӨ култууратын, социальнай эйгэтин туйгуна, «Гражданскай килбиэн» бэлиэ хаһаайына олоҕун тухары оҥорбута, айбыта-туппута, үйэтиппитэ үгүс.   Кини туһунан бу иннинэ сурулунна ини, суруллубата ини. Ол эрээри...
Элбэх оҕолоохторго — ураты болҕомто
Сонуннар | 06.06.2024 | 16:00
Элбэх оҕолоохторго — ураты болҕомто
2024 сыл ыам ыйын 28 күнүгэр ыытыллыбыт Ил Түмэн сэттис (уочараты таһынан) пленарнай мунньаҕар норуот дьокутааттара «Саха Өрөспүүбүлүкэтигэр элбэх оҕолоох ыал статуһун туһунан» өрөспүүбүлүкэ сокуонугар уларытыылары киллэриини өйөөтүлэр.   Санатан эттэххэ, дойду баһылыга Владимир Путин 2024 сыл тохсунньу ыйыгар элбэх оҕолоох дьиэ кэргэттэр статустарын болдьоҕо суох оҥорбута. Ол эбэтэр үс уонна...
Арыгы атыытын бобуутун полиция үлэһиттэрэ хонтуруоллуохтара
Сонуннар | 08.06.2024 | 11:51
Арыгы атыытын бобуутун полиция үлэһиттэрэ хонтуруоллуохтара
Куорат баһылыга Евгений Григорьев дьаһалынан VIII-с «Азия оҕолоро» Оонньуулар ыытыллар кэмнэригэр бэс ыйын 25 күнүттэн  от ыйын 8 күнүгэр диэри Дьокуускай куоракка арыгылаах утах атыыта бобуллар. Ол эбэтэр бу күннэргэ арыгылаах утах атыытыгар идэтийэр эргиэн туочукалара сабыллаллар, атын маҕаһыыннарга арыгы атыылыыр отделлар үлэлээбэттэр.  Бу хаарчах арыгынан эргинэр кафе, ресторан, бар...