Оскуола оҕолоро урукку эрэсииминэн үөрэнэллэр

Сэтинньи 8 күнүттэн 1-11 (12) кылаастар урукку эрэсииминэн, коронавирус дьаҥа тарҕамматын курдук, бары санитарнай ирдэбиллэри тутуһан очнай көрүҥүнэн үөрэхтэрэ саҕаланар. Итинник быһаарыыны куорат уокуругун Санитарнай-эпидемическэй хамыыһыйата ылыммыт. Бу туһунан Уокуруктааҕы дьаһалта пресс-сулууспата иһитиннэрдэ. 
Үөрэҕирии тэрилтэлэригэр куруһуоктар, секциялар уонна эбии дьарыктар үлэлэрэ салҕанар. Куорат территориятыгар маассабай уонна култуурунай тэрээһиннэр быстах болдьоххо тохтууллар. Оҕо киинэлэригэр уонна саататар тэрээһиннэригэр хааччахтааһын киирэр. 
Төрөппүттэр ортолоругар оҕолору кытта элбэх киһи тоҕуоруһар сирдэригэр – киинэ театрдарыгар, спорт саалаларыгар, атыы кииннэригэр уонна кафеларга, остолобуойдарга сылдьалларын аҕыйаталларын курдук сэрэтэр үлэ ыытыллар. 
Сэтинньи 8 күнүттэн 1-11 (12) кылаас үөрэнээччилэригэр уопсастыбаннай тырааныспар каартатын үлэтэ сөргүтүллэр.  
Оскуолаҕа киириэн иннинээҕи саастаах оҕолор сылдьар тэрилтэлэригэр ОРВИ тарҕамматын курдук оҕолор уонна үлэһиттэр доруобуйаларын чинчийиэхтэрэ. Ыалдьыбыттар үтүөрүөхтэригэр диэри тэрилтэҕэ киирэллэрэ бобуллар. 
Оҕо уһуйааннарыттан саҕалаан бары үөрэх тэрилтэлэригэр төһө киһи ыалдьара тиһиктээхтик хонтуруолланар, ыалдьыбыт ахсаана 20%-тан таҕыстаҕына үөрэх, иитии үлэтэ 7 күҥҥэ тохтотуллар.   
Үөрэх тэрилтэлэригэр, устудуьуоннар олорор уопсайдарыгар, култуура, спорт тэрилтэлэригэр, атыы-эргиэн, уопсастыбаннай аһылык эбийиэктэригэр уонна уопсастыбаннай тырааныспарга дезинфекциялыыр сириэстибэлэринэн генеральнай убуоркалар тиһигин быспакка ыытыллыахтара.