05.08.2022 | 14:00

Оскуолаҕа, уһуйааҥҥа киирии туһунан сиһилии

Оскуолаҕа, уһуйааҥҥа киирии туһунан сиһилии
Ааптар: Розалия ТОМСКАЯ

Быйыл – 11, эһиил 14 оскуола өрөмүөннэнэр

Дьокуускайга үөрэх дьылыгар бэлэмнэнии тэтимирдэ.

Быйыл киин куоракка уопсайа 11 оскуолаҕа хапытаалынай өрөмүөн ыытыллар: Саха политехническай лицей, Дьокуускай куораттааҕы национальнай гимназия, 10-с, 20-с, 21-с, 23-с, 27-с, 31-с, 33-с, 36-с уонна Мархатааҕы 1-гы нүөмэрдээх оскуолалар.

Үлэ федеральнай бырагырааманан үбүлэнэр. Ол курдук, өрөмүөҥҥэ көрүллүбүт 809 мөл. солк. курдук харчыттан: 720 мөл. солк. – федеральнай үп, 89 мөл. солк. олохтоох бүддьүөттэн тыырылынна.

Билиҥҥи кэмҥэ 20 уонна 36 нүөмэрдээх оскуолаларга өрөмүөн түмүктэннэ, атыттарга үлэ 70 % оҥоһулунна. Онон балаҕан ыйын 1 күнүгэр оҕолор саҥардыллыбыт оскуолаларга кэлиэхтэрэ.

Эһиилги сылга бу федеральнай бырагыраамаҕа киин куорат 14 оскуолата хапсар.

 

Ким да оскуолата суох хаалбат 

Оскуолаҕа киирии икки түһүмэҕинэн ыытыллар.

Бастакы түһүмэх муус устар ыйтан саҕаламмыта, сайаапкалары биэрии прописканан ыытыллыбыта. Ол курдук, быйыл маҥнайгы кылааска номнуо 5500 кэриҥэ сайаапка киирбит. Миэстэ ахсаанын элбэтэр сыалтан 19 оскуолаҕа уопсайа эбии 15 кылаас арыллар.

Иккис түһүмэх от ыйын 6 күнүттэн балаҕан ыйын 5 күнүгэр диэри ыытыллар. Манна прописканан хапсыбат да оскуолаҕа сайаапка биэриэххэ сөп. Онуоха биири тоһоҕолоон бэлиэтиибит: өскөтүн эһиги атын оскуолаҕа сайаапкаҕытын иккис түһүмэх саҕаланыан иннинэ, о.э. от ыйын 6 күнүн иннинэ ыыппыт буоллаххытына, аккаас тутуоххутун сөп.

 

Төрөппүттэри ордук долгутар ыйытыыларга хоруйдуубут:

✓ Сайаапканы хайдах биэрэбит?

Судаарыстыбаннай өҥөлөр порталларын нөҥүө – https://e-yakutia.ru).

✓ Оскуолаҕа киирэргэ ханнык прописка нааданый?

Бастайааннай уонна кылгас болдьоххо оҥоһуллубут пропискалар оҕону оскуолаҕа биэрэргэ тэҥ бырааптаахтар.

Ол эрэн 14 саастарын туола илик оҕолор төрөппүттэриттэн туспа пропискаланаллара табыллыбат.

✓ Прописката суох оскуолаҕа киириэххэ сөп дуо?

Куоракка прописката суох оҕолор төрөппүттэрэ оскуолаларга сайабылыанньа суруйар бырааптаахтар. От ыйын 6 күнүн кэннэ, ол аата билигин биэриэххэ сөп.

✓ Прописканан буолбакка, ханнык баҕарар чугас оскуолаҕа оҕону биэриэххэ сөп дуо?

Эмиэ оскуолаҕа ылыы иккис түһүмэҕин кэмигэр, ол аата билигин, оскуолаҕа баран сайабылыанньа суруйуохха сөп.

✓ Оҕону төрөппүттэн туспа пропискалыахха сөп дуо?

Суох. Оҕо 14 сааһын туолуор диэри төрөппүттэрин кытта олоруохтаах, биир пропискалаах буолуохтаах. Ол иһин саҥа төрөөбүт оҕону төрөппүттэр бэйэлэрин олорор сирдэригэр регистрациялыыллар.

Ийэлээх аҕа олорор сирдэрэ тус-туһунан буоллаҕына, оҕону хайа баҕарар төрөппүтүн кытта пропискалыахха сөп.

✓ Ыал улахан оҕото үөрэнэр оскуолатыгар кыра оҕону ыларга сайабылыанньа биэриэххэ сөп дуо?

Ыал улахан оҕото прописката да суох үөрэнэр оскуолатыгар ыал кыра оҕолорун биэриэн сөп – бу сокуонунан мэктиэлэнэр быраапкыт.

✓ Ханнык оскуолаҕа хапсарбытын хайдах билэбит?

Дьокуускай куораттааҕы Үөрэх управлениетын саайтыгар yaguo.ru «О приеме заявлений в 1 класс» салааны баттаан эбэтэр 40-03-44, 40-03-43 төлөпүөннэринэн чуолкайдыахха сөп.

✓ Аҕыйах ахсааннаах омуктарга чэпчэтии баар дуо?

Омугунан көрөн оскуолаҕа киириигэ туох да чэпчэтии көрүллүбэт.

Бастакы уочарат оскуолаҕа ылыллар оҕолор диэн анал усулуобуйанан кимнээх туһаналларый?

– Байыаннай сулууспалаахтар оҕолоро;

– Байыаннай сулууспа кэмигэр суорума суолламмыт дьон оҕолоро;

– Ис дьыала уорганнарын үлэһиттэрин оҕолоро;

– Полиция үлэһиттэрин оҕолоро;

– Баһаарынайдар, холуобунай систиэмэ үлэһиттэрин оҕолоро.

✓ Прописканан буолбакка, баҕарар оскуолабытыгар хайдах суруттарабыт?

Судаарыстыбаннай өҥөлөр порталларын нөҥүө e-yakutia.ru эбэтэр оскуолаҕа бэйэтигэр тиийэн.

✓ Ирдэнэр докумуоннары Үөрэх управлениетын саайтыгар көрүөххэ сөп:

https://yaguo.ru/node/788

✓ 6 сааһын туола илик оҕону оскуолаҕа биэриэххэ сөп дуо?

Биэриэххэ сөп. Анал хамыыһыйаҕа сайаапка биэрэҕит – Лермонтов уул., 79 эбэтэр бу төлөпүөннэринэн сиһилии ыйыталаһыҥ:

40-03-43;

40-03-44.

✓ Оскуолаҕа киирбиппит хаһан биллэрий?

Бастакы түһүмэххэ пропискаларынан киирбит дьон испииһэгэ от ыйыгар таҕыста. Оттон иккис түһүмэххэ сайаапка биэрбиккит кэннэ 5 үлэ күнэ ааһыахтаах.

✓ Оскуолаҕа миэстэ бүтэн аккаастыахтарын сөп. Оччотугар Үөрэх управлениетыгар эрийэҕит:

40-03-43;

40-03-44.

Исписэлиистэр атын оскуолаҕа миэстэ булан биэриэхтэрэ.

Уһуйааҥҥа тиксии

Үөрэх управлениетыгар иһитиннэрбиттэринэн, оҕо ханнык уһуйааҥҥа хапсарын 2ГИС сыһыарыыга көрүөххэ сөп:

Дьокуускай каартатын арыйабыт;

Дьиэбитин булабыт;

“Службы” салааны талабыт;

Испииһэктэн оскуоланы уонна уһуйааны булабыт.

Уһуйааҥҥа уочаракка оҕо төрөөтүн кытта турабыт. Уочаракка туруу хас да көрүҥнээх:

Судаарыстыбаннай уонна муниципальнай өҥөлөр биир кэлим порталларын нөҥүө: gosuslugi.ru/group/kindergarten_enrollment;

Саха сирин судаарыстыбаннай уонна муниципальнай өҥөлөрүн порталларын нөҥүө: e-yakutia.ru/#/shortCard/14000104;

СӨ Үөрэх өҥөлөрүн порталын нөҥүө: edu.e-yakutia.ru;

МФЦ-га тиийэн.

Сайаапка биэрэргитигэр үс тэрилтэни талыаххытын сөп – биир сүрүн уонна икки эбии үөрэхтээһин тэрилтэтин.

Дьону приемнааһын: Лермонтов уул., 79, 204 каб.; төл.: 40-03-41

Эрдэттэн приемҥа суруттарыы: https://e-yakutia.ru 

Уочараккытын бэрэбиэркэлииргэ edu.e-yakutia.ru/ порталга киирэҕит:

• «Поиск заявления» талаҕыт;

•  «Поиск по документу ребенка» баттыыгыт;

• Оҕо сибидиэтэлистибэтин нүөмэрин ыйаҕыт. 

 

Оскуола иннинээҕи үөрэхтээһин отделын дьону приемнуур эрэһиимэ:

Оптуорунньук 09.00-12.00

Сэрэдэ 09.00-12.00

Чэппиэр 09.00-12.00

*Электроннай уочаракка турбуттар бириэмэлэригэр киирэллэр, онтон атыттар – тыыннаах уочаратынан.

 

Сахалыы кылааска хайдах киирэбит?

Дьокуускайга сахалыы кылааска тиксии – таҥараттан тиксэр улахан дьол курдук ылыныллар буолбута ыраатта.

Дьиҥэ, ирдэбиллэргэ олоҕурдахха, оскуола докумуон ыларыгар төрөппүттэртэн киирбит сайабылыанньалары көрөн кылаастарын таҥыахтаах. Хас кылаас ханнык тылынан үөрэнэрин эрдэттэн быһаарыа суохтаах... Ол эрэн дьиҥ олоххо атын хартыына.

“Ийэ тыл кэскилэ” уопсастыбаннай түмсүү салайааччыта Вилюяна Никитина төрөппүттэргэ олоххо баар түгэннэргэ олоҕуран манныгы сүбэлиир:

Билиҥҥи сокуон ирдэбилинэн, төрөппүттэртэн киирбит сайабылыанньаларынан көрөн “сахалыы үөрэтэр” уонна “саха тылын үөрэтэр” кылаастар ханнык баҕарар оскуолаҕа арыллыахтаахтар. Ол эбэтэр төрөппүт бэйэтэ олорор оройуонугар турар оскуолаҕа тиийэн “оҕобун 1-кы сахалыы үөрэтэр кылааска ылыҥ” диэн сайабылыанньа суруйдаҕына, ол төһө кыалларынан хааччыллыахтаах.

“Бу оскуолаҕа сахалыы кылаас арыллыбат, ол иһин итинник сайабылыанньаны ылбаппыт” диэтэхтэринэ, ол төрөппүт уонна оҕо быраабын кэһии буолар. Онон, оҕоҕут инникитин быһаарар, кыһаллар дьон буоларгыт быһыытынан, төрөппүттэр хайаан да быраапкытын тиһэҕэр диэри туруорсуохтааххыт.

Арай «сахалыы кылааска сайабылыанньа аҕыйах, ол иһин кылаас арыллара кыаллыбат” диир түгэннэригэр, атын чугас оскуола сахалыы кылааһыгар киллэрэргэ дьулуһуоххутун сөп.

Эбэтэр маннык түгэннэр бааллар: Оҕолорун ол оскуолаҕа саха кылааһыгар киллэриэн баҕалаах төрөппүттэр уопсай сурук суруйан, куорат үөрэҕин салалтатыгар илдьэн, бырааптарын туруорсуохтарын сөп. Оннук туруорсан ситиһээччибит.

Оҕотун сахалыы үөрэттэриэн баҕарар төрөппүт,  санаатын уурдаҕына, быраабын сөпкө уонна сатаан турууластаҕына, барыта табыллар. Түмсүүлээх буоллахха, элбэҕи ситиһиэххэ сөп. Эбии да кылаас арыттарбыппыт баар суол.

Сонуннар

Ордук ааҕаллар

Өбүгэ ситимэ, күүһэ уонна көмүскэлэ
Дьон | 29.07.2022 | 18:00
Өбүгэ ситимэ, күүһэ уонна көмүскэлэ
Кэлиҥҥи кэмҥэ төрдү-ууһу үөрэтиигэ интэриэс күүһүрдэ. Бүгүн, «өбүгэ ситимэ, күүһэ уонна көмүскэлэ” диэн өйдөбүллэргэ олоҕуран, өбүгэлэрбит күннээҕи олохпутугар, куппутугар-сүрбүтүгэр дьайыыларын туһунан эмчит, удаҕан Анастасия Владимировна Картузовалыын сэһэргэһэбит.
Түргэнник оҥоһуллар салааттар
Тускар туһан | 29.07.2022 | 16:09
Түргэнник оҥоһуллар салааттар
“Венеция” Састааба: копченай халбаһы, оҕурсу, моркуоп, кукуруза, майонез. Халбаһыны, огурсуну, моркуобу барытын биир формалаан кырбыыбыт. Кукурузаны, майонеһы эбэбит.     “Нежность” Састааба: хаппыыста, копченай халбаһы, чеснок, петрушка, майонез, туус. Барытын кырбаан, чесногу олох бытархай гына кырбастаан баран, салааппытын майонезтаан кэбиһэбит.   “Суһал салаат” Састааба: крабовай палочка,  сухарик, кукуруза кэнсиэрбэтэ, пекинскэй хаппыыста, кытаанах сыыр,...
Валентина Колодезникова-Айыына:  Киһи баҕарыах эрэ тустаах
Дьон | 04.08.2022 | 10:00
Валентина Колодезникова-Айыына: Киһи баҕарыах эрэ тустаах
Бүгүҥҥү нүөмэрбитигэр мас ууһа Валентина Колодезникова--Айыынаны кытта кэпсэтэбит. Валентина-Айыына уустар түөлбэлээн үөскээбит Баайаҕа нэһилиэгиттэн төрүттээх. Тутуу биригээдэтин салайааччыта. Дьоҕурун сөпкө туһаммыт уонна киэҥ эйгэҕэ таһаарбыт уус.