ОСКУОЛАҔА КИИРИИ БЫРААБЫЛАТА УЛАРЫЙДА

2021 сылга маҥнайгы кылааска киирии быраабылата уларыйарын туһунан “Российская газета” суруйда. Урут оскуолаҕа киирэр оҕолордоох төрөппүттэртэн олунньу 1 күнүгэр диэри   сайаапка тутар эбит буоллахтарына, билигин сайаапкалары тутуу муус устар 1 күнүттэн саҕаланар буолуоҕа. Манна прописканан оскуолаҕа сайабылыанньа суруллара уонна просписката суох эрээри, баҕарар оскуолаҕытыгар суруйаргыт – барыта биир кэмҥэ тутуллар. Докумуоннары тутуу бэс ыйын 30 күнүгэр түмүктэнэр.

Урукку олохтоммут быраабыланан, оскуола оҕону үөрэнээччи быһыытынан ыларын туһунан быһаарыыны 7 күн иһигэр таһаарар эбит буоллаҕына, билигин оҕону үөрэх тэрилтэтигэр ылыы туһунан бирикээһи дириэктэр докумуону тутуу түмүктэммитин эрэ кэннэ, 3 күн иһигэр таһаарыахтаах. Ол аата докумуону тутуу оҕо пропискалааҕыттан, просписката суоҕуттан тутулуга суох бэс ыйын 30 күнүгэр диэри ыытыллар – онтон бирикээс тахсар. Оскуолаҕа бастакы уочарат ылыллааччыларынан прописканан киирэр оҕолор, маны тэҥэ эдьиийдэрэ-убайдара бу оскуолаҕа үөрэнэр оҕолор буолаллар.