18.03.2023 | 10:00

Оскуолаҕа киирээччилэргэ

(Туохтан саҕалыахтаахпытый?)
Оскуолаҕа  киирээччилэргэ
Ааптар: Розалия Томская
Бөлөххө киир

Сотору маҥнайгы кылааска киирээччилэртэн сайаапкалары тутуу саҕаланар. Билигин барыта электроннай эрэ халыыбынан барарын өссө биирдэ санатабыт.

Дьокуускайга быйыл 51 оскуола маҥнайгы кылааска киирээччилэртэн сайаапка тутар.

Сайаапканы эрдэттэн бэлэмнээҥ

Кулун тутар 20 күнүттэн саҕалаан муус устар 1 күнүгэр диэри Судаарыстыбаннай өҥөлөр порталларыгар сайабылыанньаны эрдэттэн суруйан (черновик) бэлэмниэххэ сөп. Оччоҕуна муус устар 1-кы күнүгэр Госуслугабытыгар киирэн “отправить” эрэ диэн баттыахпытын наада буолар.

Былдьаһыгынан барар миэстэлээх оскуолаларга ким бастаан кнопканы баттаабыт эрэ тиксэрин эмиэ умнумаҥ. Сүүрүүгэ түһүнээри турар аттар курдук сарсыарда эрдэттэн ноутбук, планшет иннигэр олорор төрөппүттэр элбиэхтэрэ турдаҕа...

 

5 чааһынай оскуола баар

Ордук бэлиэтээн эттэххэ, Дьокуускайга ким да оскуолата суох хаалбат. Биһиги дойдубутугар оҕо барыта орто оскуолаҕа босхо үөрэнэр бырааптаах. Ол бырааба хаһан да күөмчүлэммэт. Муниципальнай оскуолалары сэргэ киин куораппытыгар 5 чааһынай оскуола баар:

- ИП Карамзина Т.И., «Гран» начаалынай оскуола;

- ИП Бурнашев А.А., "САХАТ" чааһынай оскуола (Манна сахалыы эрэ үөрэтэллэр, гендернэй кылаастардаахтар);

- АОНО Дьокуускай куорат гуманитарнай лицейэ;

- НОУ "Восточно-Сибирский лицей";

- «Точка развития» чааһынай оскуола.

Балар бары лицензиялаахтар, орто үөрэхтээһининэн дьарыктанар көҥүллээхтэр.

 

Маны таһынан судаарыстыбаннай үөрэх тэрилтэлэрэ бааллар:

- Дьокуускайдааҕы педколледж начаалынай оскуолата (манна эмиэ прописканан ылаллар, эбии тургутан көрүүлээхтэр).

- 4 коррекционнай оскуола-интэринээт үлэлиир.

 

Ханнык оскуолаҕа хапсабыт?

* Ханнык оскуолаҕа хапсарбытын хайдах билэбит?

Дьокуускай куораттааҕы Үөрэх управлениетын yaguo.ru саайтыгар «О приеме заявлений в 1 класс» салааны баттаан эбэтэр 40-03-44, 40-03-43 төлөпүөннэринэн чуолкайдыахха сөп.

 

Сайаапканы хайдах биэрэбит?

Судаарыстыбаннай өҥөлөр порталларын эрэ нөҥүө – https://e-yakutia.ru). Эрдэттэн сайабылыанньа харатын (черновик) толорон бэлэмнэнэр табыгастаах.

 

* Бастакы уочарат оскуолаҕа ылыллар оҕолор диэн анал усулуобуйанан кимнээх туһаналларый?

– Байыаннай сулууспалаахтар оҕолоро;

– Байыаннай сулууспа кэмигэр суорума суолламмыт дьон оҕолоро;

– Ис дьыала уорганнарын үлэһиттэрин оҕолоро;

– Полиция үлэһиттэрин оҕолоро;

– Баһаарынайдар, холуобунай систиэмэ үлэһиттэрин оҕолоро.

 

Прописка элбэҕи быһаарар

* Баҕарар оскуолабытыгар хайдах суруттарабыт?

Судаарыстыбаннай өҥөлөр порталларын нөҥүө e-yakutia.ru эбэтэр оскуолаҕа бэйэтигэр тиийэн.

 

* Оскуолаҕа киирэргэ ордук ханнык прописка нааданый?

Бастайааннай уонна кылгас болдьоххо оҥоһуллубут пропискалар оҕону оскуолаҕа биэрэргэ тэҥ бырааптаахтар. Пропискаҕыт кылгас болдьохтоох диэн оскуолаҕа ылартан аккаастыа суохтаахтар.

Ол эрэн 14 саастарын туола илик оҕолор төрөппүттэриттэн туспа пропискаланаллара табыллыбат – сокуон ирдэбилэ – оҕо төрөппүтүн кытта биир сиргэ регистрацияланыахтаах.

Дьокуускайга, оскуолалара аһара туолан туралларынан уонна сахалыы эйгэлээх оскуола ахсаана биир илии тарбаҕын иһигэр батар аҕыйаҕынан сибээстээн, үчүгэй оскуолаҕа тиксэ сатаан прописка атыылаһар, атыылыыр да дьон бааллара кистэл буолбатах. Урут оҕоҕо эрэ быстах болдьоххо прописка атыылаһан оскуолаҕа киириэххэ  сөп эбит буоллаҕына, билигин биир төрөппүт оҕотун кытта бииргэ пропискаланара эрэ табыллар буолан турар.

 

* Прописката суох оскуолаҕа киириэххэ сөп дуо?

Куоракка прописката суох оҕолор төрөппүттэрэ оскуолаларга сайабылыанньа суруйар бырааптаахтар. Ол эрэн бастаан пропискалаахтары ылыы бүппүтүн кэннэ, от ыйын саҥатыгар сайаапка биэрэллэр.

 

* Прописканан буолбакка, ханнык баҕарар чугас оскуолаҕа оҕону биэриэххэ сөп дуо?

Пропискаҕытынан тиксэр оскуолаҕытыттан атын оскуолаҕа үөрэниэххитин баҕарар буоллаххытына, эмиэ оскуолаҕа ылыы иккис түһүмэҕин кэмигэр, ол аата сайын, бэйэҕит оскуолаҕа баран сайабылыанньа суруйаҕыт.

 

* Оҕону төрөппүттэн туспа пропискалыахха сөп дуо?

Суох. Оҕо 14 сааһын туолуор диэри төрөппүттэрин кытта олоруохтаах, биир сиргэ пропискалаах буолуохтаах. Ол иһин саҥа төрөөбүт оҕону төрөппүттэр бэйэлэрин олорор сирдэригэр регистрациялыыллар.

Ийэлээх аҕа олорор сирдэрэ тус-туһунан буоллаҕына, оҕону хайа баҕарар төрөппүтүн кытта пропискалыахха сөп.

 

Бииргэ төрөөбүттэр – бииргэ үөрэнэллэр

* Ыал улахан оҕото үөрэнэр оскуолатыгар кыра оҕону ыларга сайабылыанньа биэриэххэ сөп дуо?

Ыал улахан оҕото прописката да суох үөрэнэр оскуолатыгар ыал кыра оҕолорун биэриэн сөп – бу сокуонунан мэктиэлэнэр быраапкыт.

 

* Ирдэнэр докумуоннары Үөрэх управлениетын саайтыгар көрүөххэ сөп: 

https://yaguo.ru/node/788

 

* 6 сааһын туола илик оҕону оскуолаҕа биэриэххэ сөп дуо?

Биэриэххэ сөп. Анал хамыыһыйаҕа сайаапка биэрэҕит – Лермонтов уул., 79 эбэтэр бу төлөпүөннэринэн сиһилии ыйыталаһыҥ:

– 40-03-43;

– 40-03-44.

 

Миэстэ булан биэрэллэр

* Оскуолаҕа киирбиппит хаһан биллэрий?

Бастакы түһүмэххэ пропискаларынан киирбит дьон испииһэгэ от ыйыгар тахсар. Оттон иккис түһүмэххэ сайаапка биэрбиккит кэннэ 5 үлэ күнүнэн эппиэт кэлиэхтээх.

 

* Оскуолаҕа миэстэ бүтэн аккаастыахтарын сөп. Оччотугар Үөрэх управлениетыгар эрийэҕит, кинилэр ханнык баҕарар миэстэ баар оскуолатын булан биэрэллэр: 

– 40-03-43;

– 40-03-44.

Быйыл Дьокуускайга 13 оскуолаҕа хапытаалынай өрөмүөн ыытыллыаҕа. 
Федеральнай бүддьүөттэн 940 мөл. солк. тахса көрүлүннэ, эбии 116 мөл.солк. куорат бүддьүөтүттэн тыырыллар. 
Быйыл хапытаалынай өрөмүөн №5, №7, №12, №13, №19, №24, №26, №29, №38 (2 дьиэтэ) оскуолаларга, Саха гимназия, Табаҕа, Хатас уонна Маҕан оскуоларыгар буолар.

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Истиҥник санаан
Дьон | 05.07.2024 | 20:38
Истиҥник санаан
(Учууталбар Раиса Реасовна Кулаковскаяҕа ананар)
Хомунаалынай төлөбүр төһө үрдүүрүй?
Сонуннар | 11.07.2024 | 12:00
Хомунаалынай төлөбүр төһө үрдүүрүй?
Ый саҕаланыытыгар үгэспитинэн саҥа сокуоннары билиһиннэрэбит. От ыйыттан туох уларыйыыта киирдэ?
НВК Саха бырагыраамата от ыйын 8-14 күннэригэр
Сонуннар | 07.07.2024 | 10:00
НВК Саха бырагыраамата от ыйын 8-14 күннэригэр
Понедельник, 8 июля 6:00 Тиэргэн 6+ 6:30 Мы вам покажем 12+ 7:00 Сана кун 6+ 8:00 Утро Якутии 6+ 9:00 Сана кун 6+ 10:00 Утро Якутии 6+ 11:00 Тиэргэн 6+ 11:30 Айтал уонна аптаах куус 0+ 11:45 О5о саас ыллыыр 6+ 12:00 "Якутия" информационная программа 12+ 12:15 Сайдыс 6+ 12:45...