Орто анал үөрэххэ 6712 бүддьүөт миэстэтэ көрүлүннэ
Саха Өрөспүүбүлүкэтин судаарыстыбаннай бүддьүөтүн суотугар 2023-2024 үөрэх дьылыгар 42 орто анал үөрэх кыһатыгар 6712 миэстэ көрүлүннэ, мантан кэтэхтэн үөрэххэ – 70 миэстэ.
Үөрэххэ туттарсааччылартан сайабылыанньаны электроннай көрүҥүнэн атырдьах ыйын 15 күнүгэр диэри Госуслуги портал нөҥүө туталлар: https://www.gosuslugi.ru/. Ол иһигэр айар дьоҕуру, эт-хаан, уйулҕа өттүнэн тургутуулаах идэлэргэ сайабылыанньалары атырдьах ыйын 10 күнүгэр диэри күүтэллэр. Маны сэргэ хас биирдии үөрэх кыһата тутар хамыыһыйатын үлэтин сэтинньи 25 күнүгэр диэри уһатар бырааптаах.
Бэлиэтээн эттэххэ, от ыйын 1 – атырдьах ыйын 10 күннэригэр Дьокуускайдааҕы Уу тырааныспарын институтун дьиэтигэр (Водниктар уул., 1) «Абитуриент» өрөспүүбүлүкэтээҕи ыстаап үлэлиир кэмигэр үөрэх кыһаларын тутар хамыыһыйаларын эппиэттээх сэкирэтээрдэрэ үлэлииллэр.
Санатар буоллахха, 2023 сыл кулун тутар 23 күнүгэр өрөспүүбүлүкэ бырабыыталыстыбата 15 ордук ирдэнэр идэ испииһэгин таһаарбыта, манна сүрүннээн тутуу маастарын, слесарь, монтер, сварщик, информационнай ситимнэр, программирование, аһылык бородууктатын технологын, маркшейдер идэлэрэ киирбиттэрэ, диэн өрөспүүбүлүкэ бырабыыталыстыбатын пресс-сулууспата иһитиннэрэр.
Сонуннар
Ордук ааҕаллар
