Оптуобустарга мааска кэтии булгуччулаах

Дьокуускай куорат Тырааныспарка уонна суол-иис инфраструктуратыгар управлениета ааспыт нэдиэлэттэн оптуобустарга мааска кэтии эрэһиимин тутуһууну бэрэбиэркэлиир рейдэлэри ыытар.

Ол курдук, от ыйын 6 күнүгэр 5 быраабыланы кэһии бэлиэтэннэ. Маныаха 5 тыһыынча солк диэри ыстараап ууруллуон сөп. От ыйын 3 күнүттэн ыытыллыбыт рейдэлэргэ 12 боротокуол толорулунна.

Санатан эттэххэ, бэс ыйын 29 күнүттэн, хааччахтартан тахсыы иккис түһүмэҕинэн сибээстээн, оптуобустар сырыыларын икки ардыта чугаһаан биэрбитэ. “СоюзАвто” иһитиннэрэринэн, опуотубска айанныыр дьон ахсаана элбээтэ, онон оптуобус ахсаана кытта эбилиннэ. Пандемия кэмигэр айан суолугар 60-80 иһинэн оптуобус тахсар эбит буоллаҕына, билигин 240 оптуобус дьону тиэйиинэн дьарыктанар. Оптуобустар айаннарын икки ардыта 10-15 мүн, үлэлиир кэмнэрэ сарсыарда 7 чаастан киэһээ 21.00 чааска диэри буолла.

“ЯПАК” МУТ кэпсээбиттэринэн, куорат таһынааҕы нэһилиэктэргэ айанныыр оптуобустарга дьон ахсаана эмиэ биллэ эбилиннэ. Бэс ыйын 25 күнүттэн Маҕан, Кангалассы уонна Жатай хайысхатыгар эбии оптуобустар киирдилэр, уопсайа 25 оптуобус дьону тиэйэр.

Оптуобска мааската суох дьоҥҥэ кондуктордар өйдөтөр үлэни ыыталлар, ардыгар полицияны ыҥырыы кытта баар буолар. Суоппардар харыстаныы миэрэлэрин тутуһалларын эмиэ ирдиэхтээхпит.

ЯПАК оптуобустара уонна куорат иһинэн айанныыр чааһынай оптуобустар бары, Роспотребнадзор ирдэбилигэр олоҕуран, толору дезинфекцияны ааһаллар.

Ытыктабыллаах куорат олохтоохторо уонна ыалдьыттара, бэйэ-бэйэҕэ харыстабыллаах сыһыаны олохтооҥ, мааскаҕытын кэтэ сылдьыҥ, социальнай тэйиччи туттуу быраабылаларын тутуһуҥ!