Оптуобустарга хонтуруол күүһүрдэ

Ааспыт нэдиэлэттэн киин куорат оптуобустарыгар күн аайы эриэйдэ ыытыллар. “Союз Авто” тэрилтэ дириэктэрэ Андрей Косицкай иһитиннэрбитинэн, уопсастыбаннай тырааныспары хонтуруоллуур тэрээһиннэри олохтоох дьаһалта тырааныспарга салаата, куорат суһал штаба ыытар.  

Билигин киин куоракка күннэтэ 280 оптуобус  линияҕа тахсар. Кэнники күннэргэ коронавируһунан ыалдьыбыт киһи ахсаана элбээтэ, эпидемиологическай балаһыанньа уустугурда. Онон чааһынай дьону таһааччылар мааскалаах сылдьыы эрэсиими тутуһалларыгар улахан болҕомто ууруллар буолла. Ол курдук, нэдиэлэ устата 12 маршруту, уопсайа 47 оптуобуһу бэрэбиэркэлээтилэр: 1, 3, 4, 6, 7, 8, 14, 15, 16, 17, 19, 20 №.  Онтон 27-тэ билиҥҥи ураты бэлэмнээх буолуу эрэсиимигэр, санитарнай ирдэбиллэргэ эппиэттээбэтэ бэлиэтэннэ.

Хонтуруоллуур тэрээһиннэр оптуобустар сырыыларын атахтаабат. Тоҕо диэтэххэ бэрэбиэркэ үлэтэ дьон-сэргэ соччо барбат-кэлбэт, айаннаабат кэмигэр ыытыллар.