Оптуобустар сырыыларын Уопсастыбаннай палаата бэрэбиэркэлиэҕэ

Тохсунньу 17 күнүгэр Куорат уопсастыбаннай палаататын уочараттаах мунньаҕа буолла.

Палаата киин куорат биир саамай тыын кыһалҕатын – куорат маршуттарын оптуобустарын үлэтин кыһалҕатын көтөхтө. Палаата чилиэннэрэ оптуобустар сырыыларын бэрэбиэркэлиир туһунан көҕүлээһини өйөөтүлэр уонна 1 №-дээх маршруту ГРЭС оройуонугар төнүннэрэр туһунан боппуруоһу көтөхтүлэр. Маны сэргэ Оҕо саас уонна Дьиэ кэргэн сылларынан аһымал аахсыйалары, бырайыактары көҕүлээтилэр.

Мунньахха палаата саҥа чилиэннэрин билиһиннэрдилэр – 102 №-дээх «Подснежник» оҕо саадын сэбиэдиссэйэ Ирина Андриевская, 13 №-дээх орто оскуола дириэктэрэ Галина Васильева, Биир дойдулаахтар сэбиэттэрин бэрэссэдээтэлэ, Өлүөхүмэ улууһун бэрэстэбиитэлэ Алексей Куприянов, урбаанньыт Ольга Николаева уонна 203-с дьоҕус оройуон старосталарын сэбиэтин чилиэнэ Семен Попов.

Бу күн Дьокуускайдааҕы килиэп собуотун идэлээх сойууһун бэрэссэдээтэлэ Любовь Баннова, «Саха» НКИХ режиссера Сардана Протодьяконова, Куорат бэтэрээннэрин сэбиэтин бэрэссэдээтэлэ Николай Тряпша Уопсастыбаннай палаата Махтал суругунан бэлиэтэннилэр.