Оптуобустар рейстэрин ахсаана элбээтэ

“СоюзАвто” НП салайааччыта Андрей Косицкий иһитиннэрбитинэн, Дьокуускай оптуобустарын былааннарын туолуута 87 бырыһыаҥҥа тэҥнэстэ, ааспыт нэдиэлэҕэ бу көрдөрүү 83 бырыһыан этэ.

35, 3, 41 уонна 8 нүөмэрдээх маршруттарга оптуобустар айаннарын графига тупсубут. Бу маршруттары кытта олохтоох дьаһалта дуогабар көтүрэр санаалааҕын туһунан иһитиннэрэн турабыт.

Ааспыт нэдиэлэ устата дьонтон 12 үҥсүү киирбит. Оптуобус суоппардарын буруйдарынан, киһи эчэйиитэ суох, 3 суол саахала тахсыбыт.

“Оптуобустарга мааска кэтии ирдэбилин толоруу тубуста, суоппардар уонна пассажирдар бары кэриэтэ мааскалаах айанныыллар”, - диэн Андрей Косицкий кэпсээтэ.