Оптуобус сырыытын элбэттилэр

“ЯПАК” МУТ бэс ыйын 25 күнүттэн Маҕан, Кангалаас, Жатай хайысханан оптуобустар сырыыларын элбэтэрин туһунан куорат олохтоохторугар иһитиннэрэр. Тэрилтэ дириэктэрэ Валерий Домотов иһитиннэрэринэн, дьону таһар куорат тырааныспарын расписаниета олохтоохтор баҕаларын учуоттаан оҥоһулунна.

“Кэнники күннэргэ үлэ чааһын иннинэ уонна кэннинэ айанныыр киһи ахсаана элбээтэ. Ол иһин расписаниеҕа уларытыылары киллэрдибит. Ону олохтоох дьаһалта уонна Дьокуускайдааҕы автовокзал дьаһалтата билэр”,  – диэтэ Валерий Домотов.

Оптуобустар эбии сырыылара уонна айанныыр бириэмэлэрэ:

102 №-дээх оптуобус

Автовокзалтан Дьокуускай-Маҕан хайысханан 6.35 ч. уонна  9.25 ч. айанныыр.

Маҕантан Дьокуускайга – 7.45 ч. уонна 10.55 ч.

104 №-дээх оптуобус

Автовокзалтан Дьокуускай-Кангалаас хайысханан 18.30 ч. айаҥҥа турунар.

Кангалаастан кэлиитэ –  20.00 ч.

109 №-дээх оптуобус

Автовокзалтан Дьокуускай-Жатай хайысханан 16.00 ч. уонна 18.40 ч. барар.

Жатайтан кэлиитэ – 17.20 ч. уонна 20.10 ч.

Куорат таһыгар сылдьар оптуобустар сырыыларын, расписаниеларын http://yapak.ykt.ru/ сайтка киирэн көрүөххүтүн сөп.

“ЯПАК” тэрилтэ салайааччыта куорат олохтоохторун мааскаҕытын, бэрчээккигитин кэтэн айанныыргытыгар, социальнай тэйиччи туттуу быраабылатын тутуһаргытыгар ыҥырар. 

“Суоппардар уонна кондуктордар оптуобус иһин хайаан да дезинфекциялыыллар. Холобур, Хатаска сылдьар оптуобустары күн аайы ОЗ-А100 (OZ-A100) озонаторынан ыстараллар,  – диир Валерий Домотов.

Бэлиэтээн эттэххэ, куорат оптуобустарын күн аайы кичэйэн сууйаллар-сотоллор. Роспотребнадзор сүбэтинэн, коронавирус дьаҥа тарҕамматын туһугар дезинфекция үлэтин күүскэ ыыталлар.