02.04.2020 | 10:03

“Онлайн” үөрэнэр кыахтаахпыт дуо?

“Онлайн” үөрэнэр кыахтаахпыт дуо?
Ааптар: Киин Куорат

Өрөспүүбүлүкэ үөрэнээччилэрэ бары муус устар 7 күнүттэн ыраахтан (дистанционно) олорон, аныгылыы форматынан үөрэниэхтээхтэр. Биир тылынан, ыарахан балаһыанньа үөскээтэ. Үөрэх миниистирэ Владимир Егоров ол туһунан тугу кэпсиир эбитий?

ҮӨРЭНИИ ЫЙЫННЬЫГА

Дьиэттэн олорон үөрэнэргэ сүрүн быраабылалар олохтоммуттар. Уопсайа биэс хайысха баар:

– интэриниэт баарыгар;

– көмпүүтэр эбэтэр төлөпүөн суоҕар;

– интэриниэт суоҕугар;

– компьютер баарыгар;

– компьютер суоҕар уонна уот барар түгэнигэр.

Хас биирдии салааҕа сөптөөх методическай ыйынньык баар. Электроннай үөрэх «Российская электронная школа” (РЭШ) порталга “Учи.ру”, “Яндекс. Учебник”, “Якласс”, АИС “Сетевой город. Образование” о.д.а. онлайн-платформаларга ыытыллыаҕа.

Учи.ру платформа

Бу күннэргэ учууталлар, төрөппүттэр, оҕолор сыта-тура үөрэниэхтээх платформаларбыт хайдах быһыылаахтык үлэлиирин бэрэбиэркэлиибит.

«Учи.ру” онлайн-платформа оскуола биэрэр сорудаҕын толорорго – босхо. Үөрэнээччилэр платформаҕа күҥҥэ хаста да киирэр кыахтаахтар. Учуутал, оҕолору үөрэтэригэр, бэйэтэ бас билэр кабинетыгар “Начать урок” диэн кнопканы туһаныахтаах. 16.00 чааска диэри төһө баҕарар уруогу ыытыан сөп. Оттон үөрэнээччи дьиэтээҕи сорудаҕын толоруута босхо.

Ол эрээри манна төлөбүрдээх куурустар эмиэ бааллар. Маны үөрэҕи таһынан эбии дьарыктаныан баҕарар үөрэнээччи туһаныан сөп. Үөрэх булгуччулаах чааһыгар киирбэт!

Санатан эттэххэ, Учи.ру платформанан өрөспүүбүлүкэ хас даҕаны оскуолата үлэлиир.

Бастаан саҕалыырга ыарахаттардаах, өйдөммөт ыйытыы элбэх буолуон сөп. Онон СӨ Үөрэҕин уонна наукатын министиэристибэтин саайтыгар ыраахтан олорон (дистанционно) үөрэниигэ туспа салаа арыллыбыт. Манна киирэн тустаах ыйытыккытын туоһулаһыаххытын сөп. Ону таһынан, 8(4112) 506-928 төлөпүөҥҥэ эрийэн билсэргитигэр ыҥыраллар.

ВИРТУАЛЬНАЙ УЧУУТАЛ

«Аныгы үйэ”, куһаҕанын ылан эттэххэ, ыарыы ыксатан, дьэ кэллэ быһыылаах. Аан дойдуга араас хабааннаах интэриниэт сервистэрэ, үөрэнээччигэ уонна учууталга усулуобуйа олохтоон, үөрэх саҥалыы, аныгылыы систиэмэтин киллэрэллэр. Холобура, «Виртуальнай учуутал» диэн баар буолуон сөп. Виртуальнай учуутал, сүрүннээн, учуутал тустаах кылааһын кытта үлэлииригэр болҕомто уурар. Кини идэтийэр салаалара маннык: сорудахтары бэрэбиэркэлиир, ыйытыы биэриэн сөп, онлайн сурунаалы толорор уонна үөрэх расписаниетын салайар.

«Сетевой город. Образование» систиэмэ. Манна оскуола барыта кэриэтэ киирэн олорор. Бу систиэмэ төрөппүт оҕото үөрэҕэр төһө ситиһиилээхтик айаннаан иһэрин көрөр кыаҕы биэрэр.

Интэриниэт баар дуо?

Дистанционнай үөрэх, биллэн турар, түргэн интэриниэти ирдиир. Кылааска үөрэнэ олорор курдук барыта чуо-бааччы буолуохтаах. Хомойуох иһин,

өрөспүүбүлүкэ сорох дэриэбинэлэригэр, ордук ыраах хоту улуустарга интэриниэт быстар мөлтөх! Миниистир бу боппуруоһу Сибээс уонна инновация министиэристибэтэ быһаарыаҕа диэтэ.

Учуутал бэлэм дуо?

Аныгы үйэ оҕото социальнай ситимнэри барытын биэс тарбах курдук ааҕа билэр. Онон кинини “сатаан быһаарсыбат” диир кыахпыт суох. Оттон учуутал? Ордук саастаах өттө? Үөрэх миниистирэ бэлиэтииринэн, учууталлары аныгы технологияҕа, дистанционнай үөрэҕи салайарга уһуйар араас хабааннаах лиэксийэлэр, вебинардар уо.д.а. атын дьарыктар ыытыллан эрэллэр. Онон учууталлар даҕаны олохтон хаалсыбаттар.

Босхо аһылык

Кыра дохуоттаах ыаллар оҕолоро босхо аһылыгынан хааччыллыахтаахтар эбит. Бу туһунан СӨ Үөрэҕин уонна наукатын министиэристибэтин саайтыгар суруллар. “Үөрэнээччилэри аһылыгынан хааччыйар туһунан” СӨ Үөрэҕин уонна наукатын министиэристибэтэ бирикээһигэр киирбитинэн, бастатан туран, уопсай үөрэхтээһин судаарыстыбаннай тэрилтэлэрин алын, орто, үрдүкү сүһүөххэ үөрэнэр, кыра дохуоттаах уонна кыра дохуоттаах дьиэ кэргэн оҕолоро, төрөппүт (сокуоннай бэрэстэбиитэл) сайабылыанньатыгар олоҕуран, ыраахтан олорон (дистанционно) эбэтэр биирдиилээн (индивидуальнай) бырагырааманан үөрэнэр кэмнэригэр, бүддьүөттэн көрүллүбүт үбүлээһин нуорматыгар сөп түбэһиннэрэн, аһылык наборунан (сухой паек) босхо хааччыллыахтаахтар.

Иккиһинэн, тулаайах уонна төрөппүт көрүүтэ-истиитэ суох хаалбыт үөрэнээччилэр, үөрэнэр кэмнэригэр төрөппүттэрэ иккиэн суох буолбут эбэтэр кыра дохуоттаах соҕотох төрөппүт иитэр үөрэнээччилэрэ, электроннай эбэтэр ыраахтан (дистанционно) олорон уонна биирдиилээн үөрэнии ньыматыгар көспүт буоллахтарына, бүддьүөттэн көрүллүбүт үбүлээһиҥҥэ сөп түбэһиннэрэн, тус сайабылыанньаларынан харчынан компенсация эбэтэр күннэтэ нуорма аһылык ылыахтаахтар.

Үсүһүнэн, бу дьаһаллар олоххо киирэллэригэр олохтоох бэйэни салайыныы уорганнара туһааннаах бирикээһинэн салайтарыахтаахтар.

Бирикээһи СӨ Үөрэҕин уонна наукатын министиэристибэтин саайтыгар “Дистанционное образование в РС (Я)” диэн салааҕа билсиэххэ сөп.

Үөрэх дьыла уһуон сөп

Ааспыт нэдиэлэҕэ социальнай ситимнэргэ “Быйылгы үөрэх дьыла муус устарынан тохтуур үһү» диэн сурах тарҕаммыта.

Дойду Ил Дархана Айсен Николаев тэлэбиисэринэн быһа сибээскэ тахсыытыгар бу туһунан элбэх ыйытыы киирэрин бэлиэтээн турар: “Бу, билиҥҥиттэ, сурах-садьык. Чопчу быһаарыныы ылылла илик. Төттөрүтүн, дистанционнай үөрэхтээһини уһатар уонна сайыннарар туһунан санаа баар. Уонна, үөрэнээччилэр үөрэх бырагырааматын барытын үөрэтэллэрин туһугар, үөрэх дьылын болдьоҕо уһаан биэриэн сөп. Дойду маннык быһаарыныыны ылыныан сөп. Тоҕо диэтэххэ, билигин көннөрү балаһыанньа буолбатах. Биһиэхэ хаһан даҕаны маннык сытыы балаһыанньа буола илик этэ”.

БКЭ көстө

РФ Үөрэҕириигэ министиэристибэтэ Биир кэлим эксээмэн (ЕГЭ) сүрүннүүр түһүмэхтэрин бэс ыйыгар көһөрдө. Онон Биир кэлим эксээмэн (ЕГЭ) бэс ыйын 8 күнүттэн саҕаланара күүтүллэр. Cүрүн судаарыстыбаннай эксээмэн (ОГЭ) бэс ыйын 9 күнүттэн саҕаланыаҕа. Билигин тустаах график оҥоһулла илик. Түмүгү муус устар 5 күнүн кэннэ билиэхпит турдаҕа.

ТҮМҮК

Дистанционнай үөрэх инникилээх уонна кэскиллээх буоллаҕына, оскуолалары барыларын онлайн-формакка көһөрүөхтэрэ. Билиҥҥи туругунан дистанционнай үөрэххэ доруобуйаларынан хааччахтаах оҕолор үөрэнэллэр. Баар балаһыанньа киин куоракка хайдах дьайыа биллибэт. Кылааска отучча оҕо буолан үөрэнэрдээҕэр дистанционнай үөрэх, баҕар, быдан таһаарыылаах буолуон сөп.

Сонуннар

Ордук ааҕаллар

Николай Винокуров:  «Дойдубар этэҥҥэ эргиллэн кэллим...»
Дьон | 19.11.2022 | 18:00
Николай Винокуров: «Дойдубар этэҥҥэ эргиллэн кэллим...»
«Боотур» этэрээт байыастарын ортотугар биһиги биир дойдулаахпыт Алаһыай нэһилиэгиттэн төрүттээх Николай Винокуров баарын истэн, кэпсэтиэхпин баҕардым. Ол эрэн сэһэргэһиибин хайдах-туох саҕалыахпын тобуларбар олус ыарахан этэ. Бу үлэ, үөрэх, сайдыы, тэрээһин туһунан суруйуу, кэпсэтии буолбатах... Бу — олох, дьылҕа, тыын былдьаһыы, өлүү-сүтүү, инники олох иһин охсуһуу туһунан сэһэргэһии. Николай тута хоруйдаабытыгар...
Халбаакыттан — Олоҥхо тыйаатырыгар
Дьон | 25.11.2022 | 10:20
Халбаакыттан — Олоҥхо тыйаатырыгар
Дьокуускайга саха тылын учууталларын сийиэстэрин сэргэ өрөспүүбүлүкэтээҕи Олоҥхо декадата ыытылла турар. Оттон чулуу айымньыбыт баай философиятын кэлэр ыччакка тиэрдэр биир бэртээхэй ньыманан тыйаатыр буолар. Бу дьыл сэтинньитигэр Олоҥхо тыйаатыра «Дьорҕостой Бэргэн» куукуланан испэктээк туруоран сүрэхтээбитэ. Режиссер Гаврил Мэҥкээрэп Николай Калинович Шамаев-Чопчухаан (Үөһээ Бүлүү) олоҥхотунан туруоруутун Дьокуускай куорат хас да уһуйааныгар...
Мария Матвеева:  «Дьоҥҥо үтүөнэн эрэ сырыттахха, олорорго чэпчэки»
Дьон | 26.11.2022 | 10:00
Мария Матвеева: «Дьоҥҥо үтүөнэн эрэ сырыттахха, олорорго чэпчэки»
Тыа сиригэр көмүс куоластаахтар, үҥкүүһүттэр, айар, суруйар дьон баалларын куруук кэрэхсии, сэргии истэбит. Ханна да сырыттарбын талааннаах дьону кытта билсэрбин, санаа атастаһарбын туохтааҕар да ордоробун.
Элэгэнтэй Адамов:  «Сиэрдээх өй-санаа төрүт дьарыкка эрэ баар»
Дьон | 20.11.2022 | 11:00
Элэгэнтэй Адамов: «Сиэрдээх өй-санаа төрүт дьарыкка эрэ баар»
Бүгүҥҥү нүөмэргэ Чурапчы улууһун Чакыр нэһилиэгин олохтооҕо Элэгэнтэй Адамовы кытта тыа сирин олоҕун, итэҕэл, уус идэтин, сайдыы, норуот дьылҕатын, кэскилин туһунан сэһэргэстибит. Дьоҕурдаах киһи анаарыыта киэҥэ, этэр тыла оруннааҕа сөхтөрдө.