«Омикрон» штамм кэлэр куттала баар

Бырабыыталыстыба мунньаҕар өрөспүүбүлүкэ Ил Дархана Айсен Николаев бырааһынньыктар кэннилэриттэн кэлии-барыы элбээн, региоҥҥа «омикрон» штамм кэлиэн сөбүн, онон сибээстээн сэрэхтээх буолуу ирдэнэрин бэлиэтээтэ. 
Вице-премьер, Суһал штаб салайааччытын солбуйааччы Ольга Балабкина иһитиннэрбитинэн, өрөспүүбүлүкэтээҕи доруобуйа харыстабылын Министиэристибэтэ саҥа ыарыы көрүҥэ кэлэригэр бэлэм.
"Күн аайы хонтуруолга Мэҥэ Хаҥалас, Булуҥ, Сунтаар, Орто Халыма улуустара сылдьаллар. Кыһыҥҥы суол арыллан ити улуустар уһук нэһилиэктэригэр ыалдьыбыт дьон баара бэлиэтэнэр" – диэтэ вице-премьер.
Билиҥҥи туругунан регион балыыһыларыгар ыарахан туруктаах 48 ыарыһах сытар, 8 киһи – реанимацияҕа.
Тымныйан эбэтэр ОРВИ курдук ыарыйдылар да дьон тута олорор сиринэн поликлиникаттан бырааһы ыҥырыахтаах. Ыарыһахха кэлбит быраас булгуччу коронавируска анаалыс ылыахтаах. Быраас анаалыс ылартан аккаастанар түгэнигэр доруобуйа харыстабылын итии линиятыгар 122 нүөмэринэн эрийэн этиэхтэрин сөп.