Олорор сирэ суохтарга аналлаах дьиэни тутуу хамсаата

Ол курдук, Жорницкай уонна Пионерскай уулуссалар быһа охсуһууларыгар, норуокка биллэринэн 17-с кыбаарталга, хаарбах уонна саахалланар туруктаах уонна атын кыһалҕаттан олорор сирэ суох хаалбыттарга маневреннай дьиэ тутуллуоҕа диэн баһылык Евгений Григорьев «Якутия.Live» ханаалга эттэ. 
«Дьокуускай куорат биир саамай сытыы кыһалҕатынан хаарбах уонна саахалланар туруктаах дьиэлэр буолаллар. Кыһалҕалаахтары барытын биир күнүнэн саҥа дьиэ тутан көһөрө охсор кыаллыбат. Онон кэккэ түгэннэргэ маневреннай дьиэ кыһалҕата тириир. Бүгүҥҥү күҥҥэ киин куоракка 80-ча маннык дьиэ баар»,- диэтэ баһылык. 
Оттон саахалланар туруктаах дьиэ ахсаана 1159 тиийэн турар. 
«Онон куорат Олохтоох дьаһалтатыгар былааннаммыт дьиэ миэстэтигэр маневреннай дьиэни тутарга быһаардыбыт. Тутуу быйылгыттан саҕаланыаҕа»,- диэн тоһоҕолоото Евгений Григорьев.
17-с кыбаартал территориятыгар маневреннай пуонда буолар аналлаах дьиэлэри тутар былаан баарын туһунан баһылык өссө от ыйын 31 күнүгэр бэнидиэнньиктээҕи былаанныыр мунньахха этэн турар.
«Хаарбах, саахалланар туруктаах дьиэлээхтэри быстах кэмҥэ олордорго анаан 9 мэндиэмэннээх дьиэни тутуохпут. Дьиэ маҥнайгы этээһигэр полиция пууна олохтонуоҕа. Онон туһааннаах сулууспалар ити түгэни бырайыакка киллэриҥ»,- диэбиттээх.
Евгений Николаевич полиция пуунугар помещение төлөбүрэ суох бэриллэрин этэн турар. Оттон баһаартан, халаан уутуттан, олох араас очуруттан эмсэҕэлээбиттэри, саахалланар туруктаах дьиэлээхтэри быстах кэмҥэ олордор куорат бүгүҥҥү маневреннай пуондата кыһалҕалааҕы барытын батарар кыаҕа суоҕун ааһан, бэл, кыһалҕалаахтар куорат кииниттэн тэйиччи диэн аккаастаналларын санаппыта. Түмүккэ Евгений Григорьев аччаабыта икки тоҕус этээстээх дьиэ тутуллара ирдэнэрин эбэн эппитэ. 
Тутуу сакаасчытынан «Территориялары сайыннарыыга агентство» муниципальнай тэрилтэ буолуоҕа.