Олохтоохторго — үөрүү, оҕолорго — дьол!

Киин куорат араас уокуруктарыгар сайын устата тиэргэннэри тупсарыы уонна оҕо балаһааккаларын тутуу үлэтэ тиһигин быспакка ыытылынна. Биһиги хаһыаппытыгар үлэ хаамыытын, олохтоохтору туох-ханнык боппуруос долгутарын сырдата олорбуппут. Билигин номнуо кыстык хаарбыт түһэн, эбийиэктэр бары үлэҕэ киирэр түһүмэххэ киирдилэр. 
Бу сырыыга анаан-минээн кытыы сытар тиэргэннэри кэрийэн, илэ харахпытынан көрдүбүт, олохтоохтору кытта сэлэстибит. 
Санатан эттэххэ, тупсарыы, саҥардыы үлэлэрэ  «Уһук Илиҥҥэ 1000 тиэргэн» уонна «Мин тиэргэним” бырайыактарынан ыытыллар.

Автодорожнай уокурук

Автодорожнай уулусса, 40/5, 40/6 дьиэлэр тиэргэннэригэр сабыс-саҥа оҕо оонньуур балаһааккалара тутуллан киирбиттэр. Ону сэргэ суолларын аспааллаабыттар, тротуардары, олорор ыскамыайкалары аныгылыы моһуоннаах гына тупсаран оҥорбуттар. Чахчы, урукку хартыынаны кытта тэҥнээтэххэ, аныгы куорат усулуобуйатыгар сөрү-сөп эбийиэк буолбут. Салгыы көҕөрдүү үлэтэ эһиилгиттэн ыытыллара былааннаннар.

Анна:

— Бу сайын устата барытын оҥорон киллэрдилэр. Олохтоохтор бары эбийиэктэр хаачыстыбалаахтык тутуллубуттарын бэлиэтиибит. Оҕо хачыала, ыскамыайкалар барыта лоп-бааччы буолуохтааҕын курдук. Наһаа үөрэн, астынан сылдьабыт.

Игорь:

—Оҕо балааһакката наһаа үчүгэй буолбут. Ол оннугар дьиэлэрбит киирии аартыктара мөлтөһүөр соҕустар. Маны оҥорбоппут диэбиттэрэ, хапытаалынай өрөмүөн салаата оҥороро буоллар. Түгэнинэн туһанан, бары олохтоохтор ааттарыттан эбийиэктэри үлэҕэ киллэрбит дьоммутугар махтанабыт. Билигин хаар түстэ, таһырдьа тахсан оонньуур да оҕо ахсаана аҕыйаата.

Автодорожнай уокурукка улахан үлэ барбыт. Суол аспаалламмыт, саҥа тротуар, воркаут-балаһаакка, баскетбол уонна волейбол оонньуурга улахан эргиирдээх балаһаакка.

Салгыы Птицефабрика оройуонугар айаннааатым.

Птицефабрика, 6

Птицефабрика уулуссатын, 6,7 дьиэлэригэр эмиэ «Уһук Илиҥҥэ 1000 тиэргэн» уонна «Мин тиэргэним” бырагырааманан саҥа оҕо балаһаакката үлэҕэ киирбит. Автодорожнай уокуруктан туох даҕаны уратыта суох эбийиэк.

Руслан:

— Таһымнаах эбийиэги тутан киллэрдилэр. Манна олохтоохтор барытын көрө-истэ, хонтуруоллуу сырыттыбыт. Кытаатан, харыстабыллаахтык сыһыаннаһыахха, уһуннук сулууспалыырыгар кыһаллыахха наада. Хас биирдии кыбартыыраҕа оҕолор бааллар, сылаас күннэргэ тахсан оонньууллар, мээчик тэбэллэр. Аҕам саастаах дьон ыскамыайкаҕа тахсан ирэ-хоро сэлэһэллэр.