Олохтоохтор куораты тупсарыыга көмөлөһөллөр

Ыам ыйын 21 күнүгэр куорат баһылыгын тус приема буолан ааста.
Ытык кырдьаҕас Р. Протопопов куорат сирин-уотун былааннааһыҥҥа, автовокзалы көһөрүүгэ, Хатас, Үс Хатыҥ диэки тыа хаһаайыстыбатынан дьарыктанарга аналлаах сирдэргэ чааһынай дьиэ туттуута хонтуруола суох баран иһэрин тула кэккэ этиилэрдээх кэлбит. Маны сэргэ сылгы мэччирэҥин, Чернышевскай – Покровскайдыыр суол эргииргэ сытар шлюз, куорат быылын аҕыйатыы туһунан эмиэ тус санааларын, көрүүлэрин үллэһиннэ.
Приемҥа Куораты тутууга уонна тырааныспар инфраструктуратыгар департамент салайааччыта Иван Гуляев уонна кылаабынай архитектор Семен Сергеев кыттыыны ыллылар, диэн иһитиннэрэр Олохтоох дьаһалта пресс-сулууспата.
Санатар буоллахха, баһылык гражданнары кытта эрдэттэн суруйтарыынан көрсөр. Көрсүһүүгэ суруйтарарга Сурук отделыгар эбэтэр Олохтоох дьаһалта тэрилтэлэригэр сайабылыанньа суруйуохха наада. Сайабылыанньаҕа быһаартарыахтаах боппуруоһу сиһилии ыйар уонна инники өттүгэр атын инстанцияларынан туох быһаарыы ылыллыбытын сыһыарар наада. Маны сэргэ тус дааннайдары ыйар ирдэнэр: төлөпүөн нүөмэрэ, электроннай аадырыс.
Сайабылыанньаны ыытар ньымалар:
– yakutsk@sakha.ru Олохтоох дьаһалта официальнай электроннай почтатыгар;
– 40-80-76 төлөпүөнүнэн;
– Дьокуускай к., Ленин проспега, 15 аадырыска тиийэн;
– Сурук отделын аадырыһа: Дьокуускай к., Ленин проспега, 15, 113 кэб., үлэ күннэригэр сарсыарда 09:00 чаастан киэһэ 18:00 чааска диэри (эбиэккэ тохтобул – 13:00-14:00 чч.).