Олохтоох каадырдары – промышленнаска

Саха Өрөспүүбүлүкэтин Баһылыгын уонна Бырабыыталыстыбатын пресс-сулууспата иһитиннэрбитинэн, «НаВахту14» бырайыак чэрчитинэн сир анныгар үлэлиир хайа оробуочайа идэни баһылаабыт 18 эр киһи «Колмар» чоҕу хостуур хампаанньаҕа үлэҕэ киирдилэр. 
«Олохтоох каадырдары – промышленнаска» бырайыак 2017 сылтан үлэлиир. Кэнники биэс ый иһигэр 300-тэн тахса киһи үөрэнэн өрөспүүбүлүкэ территориятыгар үлэлиир промышленнай тэрилтэлэргэ үлэ булла. 
Бырайыак биэс сыл үлэлиирин тухары  36 тыһыынчаттан тахса исписэлиис үлэҕэ киирдэ, олортон аҥара – 35 саастарыгар диэри ыччат. 
Үөрэниэн уонна промышленнас тэрилтэлэригэр үлэ булуон баҕалаахтар олорор сирдэригэр баар дьарыктаах буолуу кииннэригэр, эбэтэр  навахту14.рф сайтка киирэн сайаапка биэриэхтэрин сөп.