Олохтоох дьаһалта 2023 сыл түмүгүнэн отчуота Маҕан бөһүөлэгэр буолан ааста

Олунньу 29 күнүгэр Олохтоох дьаһалта 2023 сыл түмүгүнэн отчуотун  баһылыгы куорат таһынааҕы нэһилиэктэр, тыа хаһаайыстыбатын, эргиэн уонна урбаан боппуруостарыгар солбуйааччы Владимир Аржаков оҥордо.
2023 сылга Маҕан бөһүөлэгэр Кухто уулуссатыгар спорт балаһаакката тутуллубут, нэһилиэк орто оскуолатыгар хапытаалынай өрөмүөн ыытыллыбыт, Антенная уулуссаҕа сырдатыы үлэтэ барбыт, Кыайыы 40 сыла уул., 3 аадырыстаах дьиэ тиэргэнигэр тупсарыы үлэтэ ыытыллыбыт.

Үүммүт 2024 сылга бөһүөлэк Киров уулуссатыгар сырдатыы үлэтэ ыытыллара былааннанар, маны сэргэ ГРЭС-2 бөһүөлэккэ диэри уу ситимэ тардыллыахтаах.
Отчуот кэнниттэн олохтоохтор уу ситимигэр, уулусса, тротуар  ыраастааһыныгар, кылабыыһаҕа олбуор тутуутугар сыһыаннаах ыйытыылары көтөхтүлэр. Нэһилиэнньэни маны сэргэ оскуолаҕа салҕааһын тутуу, оҕо саадын хапытаалынай, спорт саалатын өрөмүөннэрэ, эбии тротуардары тутуу, хаарбах дьиэлэри көтүрүү, ол оннугар саҥа дьиэлэри тутуу, дьэллик ыттар, сылаас тохтобуллар туруктара, элбэх оҕолоохторго учаастактары биэрии кыһалҕалара долгутара билиннэ, диэн иһитиннэрэр олохтоох дьаһалта пресс-сулууспа.