23.12.2022 | 13:00

Олох сырдык аартыга — ыччат

Дьокуускай куорат нэһилиэнньэтин баһыйар аҥаара – 30-тан 36-гар диэри саастаах ыччат. Бүгүн биһиги киин куорат Ыччат уонна уопсастыбаннай сибээскэ управлениета ааһан эрэр сылга нэһилиэнньэҕэ, ол иһигэр ыччакка аналлаах бастыҥ тэрээһиннэрин ахтан ааһыахпыт.
Олох сырдык аартыга — ыччат
Ааптар: Айталина Софронова
Бөлөххө киир

Куораты сайыннарар күүс

Кулун тутар 21 күнүттэн муус устар 20 күнүгэр диэри 45 ыччат, ол иһигэр куорат олохтоох дьаһалтатын эдэр исписэлиистэрэ, орто анал уонна үрдүк үөрэх кыһаларын устудьуоннара, ыччат уопсастыбаннай тэрилтэлэрин бэрэстэбиитэллэрэ биэс түһүмэхтээх «МЭР-2022» дьыалабыай оонньууга күрэхтэспиттэрэ.

Оонньуу хас биирдии түһүмэҕэ бэлиэ дааталарга ананан ыытыллыбыта. Бэһис түһүмэххэ хамаандалар Дьокуускай куорат төрүттэммитэ 390 сылыгар аналлаах бырайыактары билиһиннэрбиттэрэ.

Уопсай түмүгүнэн «МЭР-2022» оонньуу кыайыылаахтарынан буолбуттара:

1 миэстэ – «Инклюзивнай балаһааккалар» бырайыагы толкуйдаабыт «Социальнай эйгэ» хамаанда, хамандыыр Галина Коротова;

2 миэстэ — «Концепция умный ИЖС – Якутск» бырайыак ааптара «Тупсарыы» хамаанда, хамандыыр Алена Неустроева;

3 миэстэ – куорат сиригэр-уотугар оҕо автокуоратын бырайыагын тобулбут «Градостроительство, архитектура» хамаанда, хамандыыр Любовь Башурова.

«Аҕа күрэҕэ – 2022»

Кулун тутар 27 күнүгэр киин куоракка «Аҕа күрэҕэ - 2022» үгэс буолбут тэрээһиҥҥэ 15 хамаанда илин-кэлин түһүспүтэ.

Аҕалар уолаттарын кытта мас бэлэмнээбиттэрэ, остуолбаҕа ыттыбыттара, кутаа оттон, чэй өрбүттэрэ о.д.а. эр киһи барыта сатыахтаах уустук көрүҥнэригэр кыайыылаах үрдүк аатын былдьаспыттара. Оттон күрэх иннинэ дьиэ кэргэн историятын билиһиннэрэр айар түһүмэххэ кыттыбыттара, араас нүөмэрдэри көрдөрбүттэрэ.

Күрэхтэһии түмүгүнэн кыайыылаахтарынан буолбуттара:

1 миэстэ – Киин уокуруктан Винокуровтар дьиэ кэргэн;

2 миэстэ - Пригороднай сэл. Сивцевтэр дьиэ кэргэн;

3 миэстэ – Строительнай уокуруктан Дьячковскайдар дьиэ кэргэн.  

Аҕа дойду иһин

Алтынньы 8 күнүгэр Байыаннай-патриотическай иитии киинигэр «Аҕа дойду иһин” ыччат коммунарскай хомуура буолан ааспыта. Тэрээһин кыттыылаахтара аныгы кэм геройдарын, бойобуой дьайыылар бэтэрээннэрин кытта билсибиттэрэ. Ону таһынан араас тургутуктарга бэйэлэрин кыахтарын холонон көрбүттэрэ.

Форт-боярд

Ыам ыйын 14 күнүгэр «Алмаз» уустук быһыыга-майгыга түбэспит оҕолору уонна ыалы кытта үлэлиир киин квест тэрийбитэ. Оонньуу кыттыылаахтара «Форт-боярд» диэн киэҥник биллэр оонньуу курдук араас таһымнаах уустук тургутуулары ааспыттара.

Кэлэр кэм ыччата

«Лига будущего» – 14-тэн 35-гэр диэри саастаах эдэр дьон бэйэлэрин бырайыактарын билиһиннэрбиттэрэ. Ыам ыйын 26 күнүгэр буолан ааспыт бу форсайт-сессияҕа Дьокуускай куорат талааннаах уонна креативнай ыччата социальнай бырайыактарга сонун идеялары, куорат инники сайдыытын, баар кыһалҕалары туоратар ньымалары дьүүллэспиттэрэ.

Кырачааннарга

Сайын бастакы күнүгэр элбэх оҕолоох ыалларга, олох очуругар түбэспит ыаллар оҕолоругар уонна тулаайах, көрүүтэ-истиитэ суох хаалбыт оҕолорго «Оҕо эйгэтэ» диэн бырааһынньык тэриллибитэ.

«Үрдэл» сынньалаҥ пааркатыгар буолан ааспыт бырааһынньыкка 60 оҕо араас аттракциоҥҥа хатааһылаан, батуттарга ыстанан, аниматордары кытта үҥкүүлээн, биллиилээх фокусник Алексей Гольдеров шоутун көрөн, ону таһынан биллэр кондитер Мария Столярчик минньигэс астарын амсайан, умнуллубат күнү атаарбыттара.

Олох төрдө – дьиэ кэргэн

Бэс ыйын 25 күнүгэр Туймаада ыһыаҕын бастакы күнүгэр Дьокуускай куорат эдэр ыалларыгар анаан «Олох төрдө – дьиэ кэргэн» күрэх буолан ааспыта. Күрэххэ 8 эдэр ыал кыттыыны ылбыта. Бары түһүмэх түмүгүнэн дьүүллүүр сүбэ быһаарыытынан үһүс миэстэ Губинскай уокуруктан Игорь уонна Наталья Коньковтарга тиксибитэ. Иккис миэстэ «Счастливый мир» Дьокуускай куорат элбэх оҕолоох ийэлэрин сэбиэтин аатыттан кыттыбыт Айсен уонна Галина Сидоровтарга тиксибитэ. Кыайыылаах үрдүк аатын – «Дьокуускай куорат бастыҥ эдэр ыала-2022» анал ааты Дмитрий уонна Айталина Петровтар, Сайсары уокуругун бэрэстэбиитэллэрэ ылбыттара.

«Табыс»

От ыйын 14-16 күннэригэр «ТАБЫС» ыччат өрөспүүбүлүкэтээҕи култуурунай бэстибээлэ буолан ааспыта. Дьокуускай куораттан 27 ыччат кыттыыны ылбыта. Бэстибээл түмүгүнэн «СӨ бастыҥ эдэр ыала-2022»  күрэх кыайыылааҕынан «Дьокуускай куорат бастыҥ эдэр ыала-2022» анал аат хаһаайыттара Дмитрий уонна Айталина Петровтар тахсыбыттара. Эдэр дизайнердар уонна модельердар күрэхтэрин кыайыылааҕынан киин куорат биир талааннаах ыччата Евсей Иванов буолбута. Инньэ гынан уопсайа түмүккэ Дьокуускай куорат хамаандата үһүс миэстэни ылбыта.

Лидердэр көлүөнэлэрэ

Соторутааҕыта Дьокуускай куорат уокуруктааҕы дьаһалтатыгар «Лидердэр көлүөнэлэрэ” диэн ыччат политикатын эйгэтигэр сыл түмүгүн таһаарыыга аналлаах үөрүүлээх тэрээһин буолан ааста.

Бу дьоро күн ыччат политикатын сайыннарыыга үтүөлээхтэр “Дьокуускай куорат ыччат политикатын сайдыытыгар кылаатын иһин” анал бэлиэнэн наҕараадаламмыттара.

 

Дьокуускай куорат ыччатыгар ыытыллыбыт сыл бастыҥ тэрээһиннэрэ итинниктэр.

Сонуннар

Ордук ааҕаллар

Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
Сардаана Токоемова:  «Иистэн дуоһуйууну ылабын...»
Дьон | 28.01.2023 | 16:00
Сардаана Токоемова: «Иистэн дуоһуйууну ылабын...»
Иис сахаларга урут-уруккуттан хааммытыгар баар. Билигин биһиги ортобутугар талааннаах иистэнньэҥнэр, норуот маастардара аҕыйаҕа суохтар. Кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, туостан көбүөрдэри, сэлээппэлэри, халадаай былаачыйалары, оноолоох соннору, хаһыаччыктары о.д.а. саха дьахталлара ис сүрэхтэриттэн тигэллэр. Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр....
Мөлүйүөҥҥэ тиийэ иликпит
Сонуннар | 21.01.2023 | 17:00
Мөлүйүөҥҥэ тиийэ иликпит
Сахастат 2022 сыл түмүгэр 2021 сыллаахха ыытыллыбыт (2020 сыллаахха ковид ыарыынан сибээстээн көспүтэ) нэһилиэнньэ биэрэпиһин барыллааһын түмүгүн таһаарбыта.  Саха сирин нэһилиэнньэтин ахсаана: 995,7 тыһ. киһи  (2022 сыл тохсунньу 1 күнүгэр 992 115 киһи этэ)
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Куорат олоҕо | 01.02.2023 | 17:00
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Дьокуускай куорат историятыгар аан бастаан 990 миэстэлээх улахан оскуола аны күһүн үлэҕэ киириэхтээх.  990 миэстэ диэн бырайыактаммытынан уйунар кыаҕа буоларын өйдүөххэ наада. Киин куораппытыгар миэстэ тиийбэт кыһалҕата баарын тухары оскуолаларбыт 2-3 төгүл ноҕоруускалаах, иккилии симиэнэнэн үлэлии олоруохтара турдаҕа. Онон бу саҥа оскуолаҕа балтараа тыһыынчаҕа тиийэ оҕо үөрэнэрэ буолуо диэн барыллаан...