ОЛОХ, САНАА, ЭЙГЭ

Ааспыт сыл эргэтигэр Дьокуускайга Арассыыйа бэрэсидьиэнин көмөлөһөөччүтэ Максим Орешкин уонна Уһук Илини уонна Арктиканы сайыннарыы миниистирэ Алексей Чекунков Дьокуускайга сырыыларын чэрчитинэн «Үлэ кыбаартала» креативнай кластерга ыалдьыттаабыттара.

Үрдүк сололоох ыалдьыттар Саха сирин киэҥ нэлэмэн сирин-уотун баһылааһыны – Орто дойду олоҕун саха, олохтоох норуот хараҕынан, өйүнэн-санаатынан ылыныы нөҥүө көрдөрбүттэрин киэҥник сэргээтилэр.

Ол курдук, ОЛОХ – олох акылаата, САНАА – ис турук, ЭЙГЭ – тулалыыр эйгэ диэн өйдөбүллэр олохтоох архитектура туллар тутааҕа буолалларын, бу эйгэ талааннаах исписэлиистэрэ бу билиигэ тирэҕирэн үүнэллэрин, тыйыс айылҕалаах дойдуга баараҕай бырайыактары айалларын, сүҥкэн тутуулары ыыталларын быһаардылар.

Холобура, ОЛОХ диэн хайысхаҕа маастар-былааннар бырайыактарын билиһиннэрдилэр. Ол курдук, Саха сирэ Уһук Илин регионугар бастакынан территорияны былааннааһын стратегиятын оҥорууну саҕалаабытын, 2020 сыллаахха – уһук хоту сытар Өлөөн нэһилиэгин, 2022 сыллаахха Дом.РФ пуонда уонна СӨ Кэлэр көлүөнэлэрин тус сыаллаах пуондатын өйөбүллэринэн икки бөдөҥ куорат маастар-былааннара оҥоһуллубутун билиһиннэрдилэр.

Бэлиэтээн эттэххэ, Саха Өрөспүүбүлүкэтэ номнуо 14 маастар-былааны оҥордо, 10 маастар-былаан оҥоһулла сылдьар.

САНАА, биллэн турар, ис турук, духуобунас, култуура хайысхата. Бу хайысхаҕа «Нэһилиэнньэҕэ табыгастаах куорат эйгэтин олохтооһун» федеральнай бырагырааманан олоххо киирбит уонна Арассыыйа таһымнаах күрэххэ кыайбыт уопсастыбаннай туоналар  киирэллэр. Манна даҕатан эттэххэ, бу бырагыраамаҕа Саха сирэ биэс сыл кыттан 21 кыайыыны ситиспитэ уонна федеральнай бүддьүөттэн 1,5 млрд солк. кэриҥэ үбү ылары ситиспитэ.

ЭЙГЭ диэн социальнай хайысха буоларынан, манна үөрэхтээһин, доруобуйа харыстабылын, култуура, туризм эбийиэктэрэ, ону сэргэ Өлүөнэ муостата, аэропорт терминала курдук бөдөҥ инвестиционнай эбийиэктэр киирсэллэр. Андрей Сорокин, СИА, хаартыскаҕа түһэриитэ.