Олоҕу чэпчэтэр ньымалар

Маннык «хамыыһыйаны» сорох өҥөнү оҥорооччулар официальнай порталлара эмиэ ылаллар да буоллар, ханнык порталга, сайтка, сыһыарыыга онлайн төлөбүрдэри оҥоруохха сөбүн көрүөҕүҥ. Тымныылар түһэн эрэллэр, төлөбүрдэри сылаас дьиэҕэ олорон оҥорорго үөрэниҥ.

Судаарыстыбаннай өҥө

Муниципальнай уонна судаарыстыбаннай өҥөлөрү оҥорор сүрдээх судургу уонна табыгастаах портал. Аадырыһа – gosuslugi.ru. Манна ханнык баҕарар наадалаах өҥөнү түргэнник төлүөххэ, оҥотторон ылыахха сөп. Бэлиэтээн эттэххэ, саайт хамыыһыйата суох, төлөбүр оҥорорго регистрацияны эрэ ааһар ирдэнэр.

Ханнык өҥөлөрү хамыыһыйата суох төлүөххэ сөбүй?

Дьиэ-уот хомунаалынай төлөбүрэ

Маҥнай порталга киирэн «Төлөһүү» салаатыгар киирэн бараммыт, «хомунаалынай өҥө» диэн сирэйи баттыыбыт. Бэриллэр испииһэктэн Салайар хампаанньабытын көрдөөн булабыт. Салгыы тус счет нүөмэрин ыйар анкетаны толоробут эбэтэр сороҕор төлөбүрдээх ый болдьоҕо ыйыллар. Мантан салгыы систиэмэ киллэриллибит дааннайдарынан туһанааччыны төлөбүр сууматын ыйар сирэйгэ көһөрөр.

Чиэк биэрэр дуо?

Портал хас биирдии төлөбүргэ чек биэрэр уонна регистрацияланарга ыйбыт электроннай аадырыскар ыытар.

Массыына ыстарааба

20 күн иһигэр төлөөтөххүнэ, 50% чэпчэтиилээх. Портал чэпчэтиини тутатына оҥорор.

Иэһи-күүһү аахсарга

Бириистэптэртэн кэлэр төлөбүрдэри кэмигэр оҥорботоххо, ыстараап көтөн кэлэр.

Госпошлинаны төлүүргэ

Судаарыстыбаннай уорганнарга сайабылыанньаны портал нөҥүө ыыттахха, түһээнэ 30 % чэпчэтиилээх.

«Мир» каарта барыстаах

Сорох иэһи-күүһү, холобура, массыына ыстараабын, «Мир» каарта нөҥүө хамыыһыйата суох төлүөххэ сөп.

Уоппут уонна ититиибит

Уопсайынан, баан картатынан ханнык баҕарар өҥөнү хамыыһыйата суох төлүүргэ, өҥөнү оҥорооччу тус саайтыгар киириэххэ наада. «Якутскэнерго», «Сахатранснефтегаз” уо.д.а. олохтоох тэрилтэлэр оҥорор өҥөлөрүн «Алмаасэргиэнбаан” курдук олохтоох баан каартатынан сорох түгэҥҥэ хамыыһыйата суох төлүөххэ сөп.

Ону таһынан, хас биирдии баан бэйэтин килийиэнигэр араас чэпчэтиилэри оҥорор. Нэһилиэнньэҕэ ордук тарҕаммыт «Спасибо» уонна «Мили” диэн бырагыраамалар биллэллэр. Бонустарынан таба туһаннахха, гаас, уот, ититии да төлөбүрдэрин хамыыһыйата суох оҥоруохха сөп.

Күндү ааҕааччыларбыт! «Киин куорат» эһиэхэ олус судургу ньыманы көрдөрөр:

Ханнык баҕарар көрдүүр саайтка киирэн, холобура, «Якутскэнерго» саайтын булабыт: yakutskenergo.ru;

Сүрүн сирэйгэ «Баан каартатынан төлөөһүн» диэн ссылканы баттыыбыт;

Тус счеппутун суруйдахпытына, төһө суума төлөнүөхтээҕэ тахсан кэлэр;

Салгыы каартабыт дааннайдарын киллэрэбит, кэннигэр сурулла сылдьар үс сыыппараны эмиэ ыйабыт;

Барытын оҥорбуппутун кэннэ, төлөпүөммүтүгэр СМС-иһитиннэриинэн сыыппаранан код кэлэр. Ол кодунан төлөбүрбүтүн бигэргэтэбит;

Электроннай почтабытын ыйбыт буоллахпытына, онно чекпит кэлэр.

Маны таһынан “ГИС ЖКХ” портал, “Сбербанк Онлайн”, “ВТБ”, “Россельхозбанк”, “Газпромбанк”, “Росбанк” уо.д.а. бааннар мобильнай сыһыарыыларын нөҥүө төлүүр кыах баар.

Уубут-хаарбыт

Ууну киин куоракка «Водоканал» тэрилтэ хааччыйар. Дьон ордук  “Сбербанк Онлайн” сыһыарыы нөҥүө төлүүр.

Сыһыарыыга –  «Төлөбүр» диэҥҥэ киирэбит уонна “Водоканал (Якутск) диэни булабыт. Салгыы тус счеппут нүөмэрин суруйан, төлөбүрү бигэргэтэбит. Манна даҕатан эттэххэ, харчыбыт тиийбэт буоллаҕына, сууманы кыччатыахха сөп.

Сайтка – vodokanal-ykt.ru киирэн, сүрүн сирэйгэ “Билигин төлүүбүн” диэн түннүгү булабыт, тус счет нүөмэрин ыйан бараммыт, баан каартатын нөҥүө төлөбүрү аһардабыт.

Билиҥҥи үйэҕэ счетчик көрдөрүүлэрэ барыта ыйыллан кэлэр. Урукку курдук суруна-суруна тиийэр наадата суох. Ол эрээри ордук аҕам саастаах дьон сурунуохтарын баҕарар буоллахтарына, счетчигы көрөргө икки ньыманы кэпсиибит:

«Водоканал» бэйэтэ виртуальнай көмөлөһөөччүлээх. Киниэхэ эрийэр, кэтэһэр, боппуруоска эппиэттиир эҥин төрүт наадата суох. 8-984-100-19-74 бассаап нүөмэргэ, холобур, “Вода” диэн тылы суруйдаххытына, салгыы механизм хайдах үлэлиирин ыытар. Дьэ бу манна биир ыйга хас куб. м ууну туһаммыккын суруйар кыахтааххыт.

Өссө биир виртуальнай көмөлөһөөччүлэрэ – 507-248 нүөмэр. Эрийэн тиийдэххитинэ, сыыппаралар көмөлөрүнэн счетчик көрдөрүүтүн, тус счетуҥ нүөмэрин этэҕин.

Гааһы хас да көрүҥүнэн төлүөххэ сөп

Саха сиригэр гаас ситимин «Сахатранснефтегаз» тэрилтэ хааччыйар. Кэлиҥҥи сылларга социальнай гаастааһын даҕаны киирэн, гаас тиийбит улуустарыгар ыал эрэ барыта гааһынан ититиллэн, аһаан-таҥнан олорор. Оттон гааһынан туһаммыт иһин онлайн төлүүргэ хас даҕаны ньыма баар:

– Бассаапка чат-бот (нүөмэрэ: 8924-870-70-09);

– Телеграмҥа чат-бот (строкаҕа «Бот Сахатранснефтегаз» диэн суруй);

– aostng.ru сайтка тус кабинет нөҥүө;

–  “Сбербанк Онлайн” сыһыарыынан, “Сбербанк России” ПАУо кассаларыгар уонна терминалларыгар;

– «АЭБ онлайн» уонна «Алмаасэргиэнбаан” кассаларыгар уонна терминалларыгар.

«Сбербанк Онлайн» сыһыарыы көмөтүнэн:

* «Төлөбүр» диэни баттыыгын;

* Тус счетуҥ нүөмэрин суруйаҕын;

* Салгыы счетчик көрдөрүүтэ тахсар;

* Тахсыбыт сууманы төлөбүр строкатыгар суруй. Онтон дааннайдаргын бигэргэт уонна “Салгыы” диэни баттаан баран төлөбүрү оҥор.

Кирэдьиит эмиэ онлайн төлөнөр

Аныгы үйэ диэх курдук. Билигин хас биирдии баан бэйэтэ саайтаах, сыһыарыылаах. Биллэрин курдук, кирэдьиит анал дуогабарга оҥоһуллар, ол инниттэн киниэхэ идентификациялыыр нүөмэр бэриллэр. Аны туран, холобура, кирэдьииккитин «Тинькофф” баантан ылан баран “Сбербаан” каартатынан онлайн төлүүр түгэҥҥитигэр, бырыһыаннаах буолар. Онтон «Тинькофф” баан бэйэтин «кредитнэй" эбэтэр “дебетовай” каартатынан төлүүргэ, ол эбэтэр баан бэйэтэ оҥорбут бородууксуйатынан төлөстөххүнэ, бырыһыан ааҕыллыбыт.

“Сбербанк Онлайн” сыһыарыы көмөтүнэн хайдах төлүүбүт?

Атын баан кирэдьиитин “Сбербаан” нөҥүө дуогабар нүөмэринэн төлүөххэ сөп. Маҥнай сыһыарыыбытыгар пин-код идентификациятын ааһабыт, ол кэнниттэн:

Сыһыарыыга «Кирэдьиит төлөбүрэ» пууну талабыт;

Төлүөхтээх бааммыт аатын булабыт (БИК көмөтүнэн эмиэ булуохха сөп);

Кирэдьиит дуогабарын нүөмэрин киллэрэбит;

Төлөбүр сууматын ыйабыт;

Харчыны төлүүр ньыманы талан ылабыт: каарта счетуттан устуу  эбэтэр кумааҕы харчынан бааҥҥа тиийэн төлөөһүн;

Реквизиттэри көрөбүт уонна сөбүлэҥ кнопкатын баттыыбыт;

Квитанциябыт электроннай почтаҕа кэлэр эбэтэр тута экраҥҥа тахсар.