Октябрьскай уокурук аһыы утаҕынан эргиниини утары 762 илии баттааһыны хомуйбут
Уокурук актыбыыстара арыгынан эрэ эргинэр сыалтан үлэлиир сымыйа кафелар үлэлэрин тохтоторго 762 илии баттааһыны хомуйда.
– Сымыйа кафелары кытта оҕо тэрилтэлэрэ ыаллаһан тураллар. Итирик дьон оҕо балаһааккаларыгар таптаабыттарынан сылдьаллар. Дьиэлэр тиэргэннэрин маннык дьонтон босхолоон, нэһилиэнньэ нус-хас олорорун хааччыйыахха наада,– диэн уокурук салайааччыта Валентин Эверстов этэр.
Илии баттааһыннаах кумааҕылары уопсастыбанньыктар Урбаан министиэристибэтигэр уонна Ил Түмэн дьокутааттарыгар ыыттылар. Норуот санаата «Саха Өрөспүүбүлүкэтигэр арыгы бородууксуйатын биирдиилээн атыылааһын бириэмэтин, усулуобуйатын уонна миэстэтин эбии хааччахтааһын туһунан» сокуон барылын дьүүллэһиигэ болҕомтоҕо ылылларыгар эрэллэрэ улахан.
– Дьокутааттар сокуону ырытыыга общепит тэрилтэтэ 75 кв. м улахан иэннээх буоларын ылыннахтарына, биһиги уокурукпутугар үс сымыйа кафе үлэтин тохтотор кыаҕы биэриэҕэ. Бу «кафе” аатынан саптынан арыгынан эригинэр саарбах тэрилтэлэр элбэх кыбартыыралаах олорор дьиэлэр тастарыгар үлэлииллэрин таһынан, үөрэх, оҕо тэрилтэлэрин кытта ыаллаһаллар,– диир Управа салайааччыта.