Оҕурсу — өлбөт мэҥэ уута

"Оҕурсу" диэн тыл грек омук тылыттан "сииктээх оҕуруот аһа" диэн тылбаастанар. Кини 96 бырыһыана ууттан турар. Маны билэр дьон "көннөрү уу буолбатах, өлбөт мэҥэ уута" дииллэр эбит. Бу уу састаабыгар калий, кальций, магний, дьуот, фосфор, натрий, тимир о.д.а. элеменнэр бааллар. Оҕурсу элбэх калийдаах буолан, хаан баттааһынын нуорматыгар түһэрэр. Маны таһынан оҕурсуга В бөлөхтөн С, А, РР битэмииннэр бааллар.
 Оҕурсуну медицинэҕэ былыргыттан туһаналлар. Сүрэхтэрэ, бүөрдэрэ, тымырдара ыалдьар дьоҥҥо бу эмтээх ас олус туһалааҕын бэлиэтииллэр. Оҕурсу сүмэһинэ сэллик ыарыытын сымнатар, ньиэрбэни уоскутар, сүһүрүүнү утарсар бэртээхэй эмп быһыытынан норуокка биллэр. Ол эрээри куртах бааһа, синньигэс оһоҕос төрдө, ноор, колит курдук ыарыылар бэргиир кэмнэригэр оҕурсуну сиири тохтоторго сүбэлииллэр. Элбэх калийдаах буолан, кислотнай холбоһуктары суох оҥорор, организмҥа улаханнык туһалыыр.
Исписэлиистэр быһааралларынан, оҕурсу ас буһарыытын тупсарар, ириҥэрии, сытыйыы процеһын тохтотор. Сибиэһэй оҕурсуну тиһигин быспакка сиир киһи щитовиднай быччархай ыарыытыгар ылларбат. Сүрэх үлэтэ кэһиллиитигэр уонна уойууну утары сииргэ эмиэ сүбэлииллэр. Сүмэһинэ бэртээхэй лосьон быһыытынан тириини көрүүгэ-истиигэ туһаныллар. Бу суогунан күн ахсын соттор киһи тириитэ сотору кэминэн сэргэхсийбитин бэлиэтии көрүөҕэ. Оҕурсу хаҕа сирэйи маҥхатар, ыраастыыр, сымнатар уонна эрдэ мырчыстыыттан харыстыыр.