"Оһуохай" түмсүү 35 сыла

Бүгүн Култуура уонна сынньалаң пааркатыгар “Оһуохай” уопсастыбаннай түмсүү 35 сыллаах үбүлүөйүн бэлиэтиир тэрээһин буолан ааста. Түмсүүнү Александр Джурович Данилов сатабыллаахтык салайар.

 Намтан, Мэҥэ Хаҥаластан, Алдантан, Сунтаартан үгүс ыалдьыттар кэлбиттэр. Саамай улахан  дэлэгээссийэни Дархан этээччи Валентин Васильевич Хорунов салайан аҕалбыт. 

Туймаада ыһыаҕын кэмигэр ыытыллыбыт үбүлүөйдээх оһуохай күрэһин кыайыылаахтарыгар Марта Николаеваҕа, Василий Игнатьевка, Виталий Никифоровка Дархан этээччи бэлиэтин туттардылар. 

Оттон Дархан этээччилэр күрэстэригэр Семен Черноградскай кыайан, Аан Дархан этээччи ытык аатын ылла. 

Ыһыахха кэлбит дьон ис минин, кымыһы босхо амсайдылар. Бастыҥ оһуохайдьыттарга кынат буолан тэҥҥэ үҥкүүлэһэн, сэргэхсийэн, астынан тарҕастылар.