Оҕолорго аналлаах вакцина кэллэ

Өрөспүүбүлүкэҕэ коронавирус дьаҥын утары оҕолорго аналлаах вакцина бастакы баартыйата – барыта 720 дуоза кэллэ. Бу туһунан регионнааҕы Суһал штаб салайааччытын солбуйааччы Ольга Балабкина эпидемиологическай быһыыны-майгыны сырдатар брифиҥҥэ иһитиннэрдэ.  
«Биһиэхэ 720 дуоза оҕолорго аналлаах вакцина бастакы баартыйата кэллэ, сотору кэминэн 12 саастарыттан 17-гэр диэри оҕолорго баҕа өттүнэн быһыыны саҕалыахпыт. Бастакынан оҕолоругар быһыы туруортарыахтарын баҕаралларын куорат уонна өрөспүүбүлүкэ медицинскай үлэһиттэрэ биллэрдилэр.  Санатабыт, оҕолорго быһыыны туруоруу — баҕа өттүнэн ыытыллар тэрээһин, ол туһунан быһаарыыны оҕо сокуоннай бэрэстэбиитэллэрин быһыытынан төрөппүттэр ылыналлар», — диэтэ кини.
Итини сэргэ Ольга Балабкина бүгүҥҥү күҥҥэ коронавируһунан ыалдьыбыт оҕо ахсаана аҕыйыы илигин бэлиэтээтэ.