Оҕолоох дьиэ кэргэттэри өйүүр миэрэ кэҥиир

Ааспыт нэдиэлэҕэ Арассыыйа бэрэсидьиэнэ Владимир Путин социальнай өйөбүл боппуруостарыгар туһаайыллыбыт Судаарыстыбаннай сэбиэт президиумун мунньаҕын ыытта. Дойду баһылыга бэлиэтээбитинэн, билигин, дьиэ кэргэттэр оҕолорун күүтэр кэмнэриттэн 17 сааһыгар диэри судаарыстыбаннай өйөбүлүнэн туһаналлар. Ити миэрэнэн 10 мөлүйүөн кэриҥэ киһи хабыллыахтаах диэн иһитиннэрдэ СӨ Үлэҕэ уонна социальнай сайдыыга министиэристибэтин пресс-сулууспата. 
Саха сиригэр кэнники үс сыл иһигэр ийэ буолуу уонна оҕо саас өйөбүлүгэр үбүлээһин  4 төгүл улаатта, ол иһин оҕо төрөөһүнүн таһыма намтаабат.  Барыллаан дааннайдарынан, 2022 сылга, босуобуйанан 8 саастарыттан 17 саастарыгар диэри  41 256 оҕо туһаныаҕа.
Биир кэмҥэ үстэн элбэх оҕону төрөппүт, сокуоннай саастарын ситэ илик биэстэн уонна уонтан тахса оҕолоох дьиэ кэргэттэр олорор усулуобуйаларын тупсарар сыаллаах олох-дьаһах бырагыраамалара салгыы олоххо киирэллэр. Быйыл социальнай төлөбүрүнэн туһанар биэстэн саҕалаан сокуоннай саастарын ситэ илик оҕолордоох ыаллар ахсааннара икки төгүл элбээтэ, өрөспүүбүлүкэ бүддьүөтүттэн үбүлээһин суумата – 500 мөлүйүөн солкуобай. Социальнай төлөбүрү 14 муниципальнай оройуоҥҥа уонна Дьокуускай куорат уокуругар биэстэн саҕалаан сокуоннай саастарын ситэ илик оҕолордоох 124 ыал ылыаҕа. 
Манна даҕатан эттэххэ, быйыл төрөөбүт үһүс оҕоттон саҕалаан, 547 босуобуйанан туһанааччы ипотекатын сабар кыахтанна. 
Элбэх оҕолоох төрөппүттэр төгүрүк сыл тухары Уһук Илиҥҥи маршруттарынан субсидиянан туһанан айанныыр бырааптаннылар. 
Бүтүн Арассыыйатааҕы бырааһынньыктары сэргэ өрөспүүбүлүкэҕэ Аҕа, Ийэ, Кыыс, Уол күннэрэ бэлиэтэнэллэр, 20-чэ сыл «Сыл дьиэ кэргэнэ» өрөспүүбүлүкэтээҕи бэстибээл чэрчитинэн дьиэ кэргэн күрэхтэрэ ыытыллаллар, кыайыылаахтарга 300 тыһыынча солкуобай кээмэйдээх харчынан төлөбүр бэриллэр. 
Итини сэргэ харчы төлөбүрдээх судаарыстыбаннай наҕараадалар бааллар.
Үбүлүөйдээх сылга оҕо сааһы уонна иитиини көмүскүүр уопсастыбаннай көҕүлээһиннэри өйүүр сыалтан, гражданскай уопсастыбаны сайыннарыыга Саха Өрөспүүбүлүкэтин Ил Дарханын гырааннарын кээмэйэ үрдэтилиннэ. 
Быйыл ити хайысханан 5 мөлүйүөн солкуобай көрүлүннэ. Гыраан ылбыттар ортолоругар «Чурапчы кэскилэ» оҕо уопсастыбаннай тэрилтэтэ, «Якутский республиканский центр медиации» автономнай кэмиэрсийэтэ суох тэрилтэ, «Дети Саха-Азия» норуоттар икки ардыларынааҕы оҕо пуондата, «Бүтүн Арассыыйатааҕа инбэлииттэр уопсастыбаларын» Мииринэйдээҕи уопсастыбаннай тэрилтэтэ, «Дьүөгэлэр» Саха Өрөспүүбүлүкэтин дьахталларын аһаҕас форумун регионнааҕы уопсастыбаннай хамсааһына бааллар.