Оҕо сынньалаҥа: төлөбүр аҥаарын хайдах төннөрөбүт?

Кырдьык, төрөппүт эрэ барыта оҕотун сынньалаҥ лааҕырыгар ыытар кыаҕа суох. Сыана күн-түүн үрдүү турар. Онуоха эбии кэлэр-барар бырайыаһы уйунуоххун наада. Аны элбэх оҕолоох буол. Арай судаарыстыба саҥа өйөбүлүнэн туһаныахпытын сөп.

Ыам ыйын 25 күнүттэн сайыҥҥы сынньалаҥ лааҕырдарыгар путёвка сыанатын 50 % төнүннэриэххэ сөп. Бу “Биир ньыгыл Арассыыйа” партия этиитин РФ Бэрэсидьиэнэ Владимир Путин өйөөбүтэ. Маныаха 5 млрд солкуобай үп көрүлүннэ.

Бырагыраама туһунан үгүс төрөппүт истэ илик эбэтэр үчүгэйдик билбэт. Бүгүҥҥү нүөмэрбитигэр ыйытык уонна хоруй быһыытынан туһалаах иһитиннэриини бэлэмнээтибит. Ылан ааҕыҥ, тускутугар туһаныҥ. 

❓Хаһааҥҥа диэри путёвка атыылаһыахпытын сөбүй?

Атырдьах ыйын 31 күнүгэр диэри лааҕыргытын талан төлүөххүтүн наада. Оҕо балаҕан ыйын 15 күнүгэр диэри төннүөхтээх.

❓Бу бырагыраамаҕа ханнык лааҕырдар хапсалларый? Испииһэги ханна киирэн көрүөххэ сөбүй?

– Судаарыстыбаннай уонна коммерческай лааҕырдар киирэллэр. Ол эрээри хонуктаахтар (стационарнай). Балааккалаах уонна күнүскү өттүгэр үлэлиир лааҕырдар хапсыбаттар. Испииһэк мирпутешествий.рф сайтка баар.

Путёвка атыылаһаргытыгар лааҕыр сайтыгар баар иһитиннэриини болҕойон ааҕыҥ, бырагыраамаҕа киирэрин-суоҕун бэрэбиэркэлээҥ. Оттон туроператор эбэтэр агрегратор сайтыттан атыылаһар буоллаххытына, бырагыраамаҕа киирбит лааҕыр анал маркировканан бэлиэтэнэр.

❓ Путёвкабытын хайдах төлүүбүт?

– «Мир» каартанан онлайн төлүүгүт. Бырагыраама партнердарын (лааҕыр, туроператор эбэтэр агрегатор) сайтарын нөҥүө эрэ кыаллар.

 Кешбэк «Мир» каартаҕа эрэ түһэр.  Visa, Mastercard, Maestro, кобейджинговай каарталар ааҕыллыбаттар. Уу харчынан төлөөбүт буоллаххытына, бырагыраамаҕа киирсибэккит.

❓ Төлөбүр сууматыттан төһө харчы төннөрүй? Хаһан уонна ханна түһэрий?

– Төлөбүр сууматын 50 %-гар тэҥнэһэр. Ол эрээри 20 тыһыынча солкуобайтан тахсыбат. Биэс күн иһигэр каартаҕытыгар түһэр.

❓ Хааччахтар бааллар дуо? Хас саастарыгар диэри оҕолор туһаныахтарын сөбүй?

– Оҕо сааһыттан тутулуга суох, онно хааччах суох. Аны туран, оҕо сынньанар симиэнэтин ахсаана эмиэ хааччахтаммат. Хас да оҕо чэпчэтиинэн тэҥҥэ туһаныан сөп. Ол эбэтэр биир «Мир» каартанан хас даҕаны путёвканы төлүүр кыахтааххыт. Манна өссө биири тоһоҕолоон бэлиэтиибит – каарта хайаан да төрөппүт киэнэ буолбат.

❓Өскөтүн биһиги оҕо сынньалаҥар чэпчэтиилээх сертификаттаах буоллахпытына, бу бырагырааманан туһанар кыахтаахпыт дуо?

– Маннык түгэҥҥэ сертификакка эбии бэйэҕит төлөөбүт суумаҕыт аҥаарын төнүннэриэххитин сөп. Ол эрээри 20 тыһыынча солкуобайтан тахсыбат.

❓Биһиги путёвкабытын эрдэ атыыласпыппыт. Кешбэк оҥорторуохпутун сөп дуо?

– Бырагыраама саҕаланыан иннинэ сайыҥҥы симиэнэҕэ путёвка ылбыт буоллаххытына, бэс ыйын 15 күнүттэн “Госуслуги” портал нөҥүө сайаапка биэриэххитин сөп. Онуоха төлөбүр докумуоннара ирдэнэр. Ол сууматын аҥаара төннөр, ол эрээри 20 тыһыынча солкуобайтан тахсыбат.

❓Өскөтүн оҕобутун симиэнэ бүтэ илигинэ ылыахпытын баҕардахпына, хайдах гынабытый?

– Маннык түгэҥҥэ төлөбүр сорҕото эрэ төннөр. Ааҕыллыбыт кешбэк суумата төлөбүр оҥоһуллубут каартатыттан бэйэтэ уһуллар. Кээмэйэ бу курдук суоттанар. Холобур, путёвка сыаната 20 000 солк., туроператор эбэтэр лааҕыр ааҕан баран 5000 солк.төннөрүөхтээх, оччотугар 2500 солк. (5000 солк. 50% -на) кешбэк судаарыстыба бүддьүөтүгэр төннөр.    

***

Билигин бырагыраамаҕа лааҕырдары эбии киллэрэллэр. Ол  сайтка бэс ыйын 5 күнүттэн көстүөҕэ.

Сиһилии мирпутешествий.рф сайтка “Оҕо лааҕырдара” салааҕа киирэн көрүҥ. Дойду үрдүнэн үлэлиир быһа линия төлөпүөнэ: 8 (800) 200-34-11. Саха сиринээҕи быһа линия төл.: 89248687011.

Дьокуускай куорат дьаһалтатын пресс-сулууспата иһитиннэрбитинэн, бу лааҕырдарга кешбэк бырагыраамата үлэлиир:
-«Спутник» чэбдигирдэр лааҕыр (2 №-дээх орто оскуола) 
-«Каландаришвили» (31 №-дээх орто оскуола)
-  «Бинго» (36 №-дээх оскуола) 
-«Радуга» (Саха политехническай лицей)
- «Родничок» (21 №-дээх орто оскуола).