Оҕо чэбдигирдэр лааҕырдара «сабыылаах» эрэсииминэн үлэлииллэр

Пандемиянан сибээстээн Дьокуускай куораттааҕы оҕо чэбдигирдэр лааҕырдара 75%-тан  аҕыйах оҕону хабан «сабыылаах» эрэсииминэн үлэлииллэр. 
Бэс ыйын 25 күнүттэн куорат таһынааҕы «Бинго»  (36 №-дээх оскуола), «Радуга» (СПЛ), «Родничок» (21 №-дээх оскуола), «Спутник» (2 №-дээх оскуола), «Каландаришвили» (31 №-дээх оскуола) лааҕырдарга 396 оҕо сынньанар.
Санитарнай-эпидемиологическэй ирдэбилинэн оҕолор уонна үлэһиттэр лааҕырга тэҥҥэ, биир кэмҥэ киирбиттэр эбит. Смена бүтүөр диэри лааҕыртан ким да тахсыа суохтаах.  
Лааҕырга киириэхтэрин үс хонук иннинэ оҕолор уонна үлэһиттэр COVID-19 бэрэбиэркэлээн ПЦР анаалыһын туттарбыттар. 
Үөрэҕирии Управлениета иһитиннэрбитинэн, бары муниципальнай куорат таһынааҕы лааҕырдар путевкаларыгар оҕо сынньалаҥар уонна чэбдигирдиитигэр диэн өрөспүүбүлүкэттэн 13713 солкуобай субсидия көрүллүбүт. Лааҕырдар путевкаларын сыаната арааһыттан көрөн төрөппүттэр ол ордугун төлүүллэр. 
Итини таһынан, төрөппүттэр кэшбэгынан путевка сыанатын 50% төннөрүөхтэрин сөп. Мирпутешестий.рф сайт нөҥүө МИР каартанан төлөөбүт төрөппүттэр кэшбэктара төннөн эрэр. 
Итини сэргэ, 97 уустук түбэлтэҕэ сылдьар уонна Уокуруктааҕы дьаһалта иһинэн үлэлиир сокуоннай саастарын ситэ иликтэр Хамыыһыйаларыгар уонна полиция учуоттарыгар турар  оҕолорго «2018 - 2022 сылларга куорат уокуругун үөрэҕириитин сайыннарыы» муниципальнай бырагыраама суотугар сынньалаҥ уонна чэбдигирдии тэрилиннэ. 
Муниципальнай лааҕырдар иккис сезоннара от ыйын 18 күнүттэн саҕаланар. Ол курдук, лааҕырдар - «Родничок» иккис сезона от ыйын 19 күнүттэн атырдьах ыйын 8 күнүгэр диэри, «Спутник» от ыйын 20 күнүттэн атырдьах ыйын 9 күнүгэр диэри, «Каландаришвили» от ыйын 29 күнүттэн атырдьах ыйын 18 күнүгэр диэри, «Бинго» от ыйын 18 күнүттэн атырдьах ыйын 7 күнүгэр диэри, «Радуга» от ыйын 19 күнүттэн  атырдьах ыйын 8 диэри үлэлиэхтэрэ.