Оҕо быраабын саҥа боломуочуйалааҕа – Туйаара Васильева
Муус устар 18 күнүгэр Ил Түмэн уочараттаах 36-с пленарнай мунньаҕар норуот дьокутааттара СӨ оҕо быраабын боломуочуйалааҕын аныырыгар Ил Дархаҥҥа сөбүлэҥнэрин биэрдилэр. Дьокутааттар уопсай куоластааһыннарынан өрөспүүбүлүкэҕэ оҕо быраабын боломуочуйалааҕынан СӨ үлэтин уонна социальнай сайдыытын министиэристибэтин социальнай харыстабылын киинин исписэлииһэ Туйаара Васильева ананна.
Туйаара Валерьевна бэйэтэ биэс оҕо ийэтэ, “Ийэ албан аата” наҕараадалаах, көхтөөх уопсастыбанньык быһыытынан биллэр. Оҕо иитиитигэр уонтан тахса сыл үлэлээбит, итинтэн аҕыс сыл устата – дьиэ кэргэн бэлиитикэтин департаменыгар. Кини Ригатааҕы авиационнай университеты, М.К.Аммосов аатынан Саха государственнай университетын уонна Салайыы институтун үөрэнэн бүтэрбит.
Дьокутааттар саҥа анаммыт оҕо быраабын боломуочуйалааҕа Туйаара Васильеваҕа оҕо аһылыгар, тулаайах эбэтэр төрөппүт көрүүтэ-истиитэ суох хаалбыт оҕолору дьиэлээһиҥҥэ, уустук балаһыанньаҕа түбэспит оҕолорго болҕомтону ордук уурарга, ону сэргэ дьиэ кэргэҥҥэ аҕа оруолун күүһүрдэргэ эттилэр.
Сонуннар
Ордук ааҕаллар
