15.01.2021 | 07:36

ОҔО БОСУОБУЙАТА ҮРДЭЭТЭ (Ол эрэн барыларыгар буолбатах)

ОҔО БОСУОБУЙАТА ҮРДЭЭТЭ (Ол эрэн барыларыгар буолбатах)
Ааптар: Киин Куорат

Саҥа дьыл саҥатыгар кыаммат ыал 3-7 саастаах оҕолоругар ылар босуобуйата икки төгүл үрдүүр буолла диэн сонуну үөрэ-көтө үллэстибиппит. Ааспыт сылга кыаммат ыал үстэриттэн аҕыс саастарыгар диэри оҕолоругар олох таһымын алын кээмэйин хайа охсор аҥаарын саҕа босуобуйаны ылбыт эбит буоллахтарына (Саха сиригэр ортотунан ыйга 8500 солк. этэ), быйылгыттан бу босуобуйа олох таһымын алын кээмэйин толорутугар тэҥнэһиэҕэ диэн буолбута...

Босуобуйа үрдүөҕэ эрээри, бука барыларыгар буолбатах. Ол курдук, босуобуйа маннык бэрээдэгинэн ананыаҕа:

1) Босуобуйа стандарта син биир олох таһымын алын кээмэйин аҥаарыгар тэҥ буолуоҕа.

2) Бу босуобуйа ыалга киһи ахсаанынан дохуоттарын олох таһымын алын кээмэйигэр тиэрдибэт буоллаҕына, дьиэ кэргэн дохуотун олох таһымын алын кээмэйигэр тэҥниир туһуттан, босуобуйа олох таһымын алын кээмэйин 75 бырыһыаныгар тэҥнэһиэҕэ.

3) Бу босуобуйа эмиэ тиийбэт түгэнигэр, оҕо босуобуйата олох таһымын алын кээмэйин толору кээмэйигэр тэҥнэһиэҕэ.

Ол аата кыаммат ыал барыта икки төгүл үрдэтиллибит босуобуйаны ылар диэн буолбатах буолан таҕыста.

Оҕо босуобуйатын суоттуурга тугу учуоттуубутуй?

Санатан эттэххэ, босуобуйа кыаммат ыал (ол аата уопсай дохуоттара олох таһымын алын кээмэйигэр тиийбэт) 3-7 саастаах оҕолоругар  (8 саастарын туолуохтарыгар диэри)  ананар.

Ыал дохуотун быһыытынан ааҕыллар:

  • Хамнас, бириэмийэлэр, хамнаска эбии төлөбүрдэр – 13 бырыһыан нолуок тутуллуон иннинэ ааҕыллар.
  • Ханнык баҕарар биэнсийэ, босуобуйа.
  • Стипендия.
  • Алименнар.
  • Бааҥҥа уурунууттан бырыһыаннар.
  • Бэйэ дьыалатынан, предпринимательствонан киирэр дохуот.
  • Өлбүт дьон страховкаларын ылбыт буоллаххытына.
  • Ый аайы страховкаҕытыттан ылар харчыгыт.
  • Ханнык баҕарар биэнсийэ уонна босуобуйа.
  • ИДьМ, УФСИН, таможня уо.д.а. сулууспалаахтар хамнастарыгар эбии төлөбүр.
  • Судаарыстыбаннай уонна уопсастыбаннай үлэ иһин компенсация.
  • Сыаннай кумааҕылартан киирэр дивиденнэр, бырыһыаннар.
  • Баайы-дуолу атыылааһынтан киирбит үп.
  • Интеллектуальнай, ааптарыскай бас билии иһин дохуот.

Ыал дохуотугар хабыллыбат:

  • 3-7 сааһыгар диэри саастаах оҕолорго ылбыт босуобуйаҕыт.
  • “Путин босуобуйаларыттан”: 3-7 саастаах оҕоҕо оҥорторор буоллаххытына, бу иннинэ ылбыккыт дохуокка эбии ааҕыллыбат.
  • Бүддьүөттэн айылҕа саахалларыгар түбэһэн ылбыт көмөҕүт киирбэт.
  • Ахсынньыттан өрөспүүбүлүкэттэн 3-7 саастаах оҕоҕо ылыллыбыт босуобуйа киирбэт.
  • Ийэ хапытаалын хайа да көрүҥэ дохуот быһыытынан ааҕыллыбат.
  • Эмтэнии реабилитация айаныгар анаммыт төлөбүр харчыта түспүт буоллаҕына, ол дохуот буолбат.

Дьиэ кэргэн дохуота сайабылыанньа биэриэхтэрин иннинээҕи 12 ыйдааҕы, ол иһигэр ааспыт 6 ый устатынааҕы ааҕыллар. Ол аата 2021 сыл тохсунньутугар 2019 сыл бэс ыйыттан 2020 сыл бэс ыйыгар диэри дохуот суоттанар.

Дьиэ кэргэн састаабыгар киирэллэр:

  • Икки төрөппүт иккиэн, кэргэннии буолуулара сокуонунан буолбатах да буоллаҕына (бииргэ олорор буоллахтарына).
  • 18-тарын туола илик оҕолор. Бииргэ олорор сокуоннай саастарын сиппит оҕолору, эбэлэри, эһэлэри дьиэ кэргэн састаабыгар киллэрбэттэр.

Сонуннар

Ордук ааҕаллар

Бэрт былдьаһар норуот сайдыбат
Сытыы муннук | 01.05.2021 | 20:45
Бэрт былдьаһар норуот сайдыбат
«Сахалар сүрдээх сэмэй омукпут ээ» дэһэбит ардыгар. Бу бэйэбитин омук быһыытынан сыаналанар быһыыбыт дуу, эбэтэр оннук майгылаахпыт, култууралаахпыт, сиэрдээхпит эбитэ дуу?   Саха кырдьаҕас омугунан биллэр. Өбүгэбит олоххо муударай көрүүтэ үйэлэртэн үйэлэргэ өс хоһоонунан, сахабыт тылын дэгэтинэн хоһуйуллан, күн бүгүҥҥэ диэри тиийэн кэллэҕэ. Үтүө быһыыны оҥордоххо, “Үтүө үтүөнэн эргиллэн кэлэр”...
Тимир ууһа олоҕу кытта тэҥҥэ хардыылыыр
Дьон | 03.05.2021 | 10:34
Тимир ууһа олоҕу кытта тэҥҥэ хардыылыыр
Саха сиригэр коронавирус ааспыт сылга кэлбитэ. Туох-ханнык балаһыанньа үөскүөхтээҕин ким даҕаны билбэт этэ. Икки атахтааҕы таҥнары баттыыр ыарыыбыт уоскуйар санаата суох. Бу дьаҥы утары охсуһар биир саамай көдьүүстээх тэрилинэн салгыны ыраастыыр рециркуляторы ааттыахха сөп. Саха сиригэр биир бастакынан олоххо киллэрбит киһинэн «Якутия» технопаарка резиденэ Иннокентий Уран буолар.   Иннокентий Уран...
Тренер үлэтэ үрдүктүк сыаналанна
Дьон | 03.05.2021 | 10:58
Тренер үлэтэ үрдүктүк сыаналанна
Ханнык баҕарар нэһилиэк, сир-дойду аатырар онно олорор дьонунан-сэргэтинэн, кинилэр суон сурахтарынан, оҥорон хаалларбыт дьыалаларынан. Бүгүн биһиги хаһыаппыт ыалдьыта, чахчы да, килбиэннээх олоҕу олорбут, үтүмэн үгүс үлэни үлэлээбит-хамсаабыт, ыччаты спортка, хайыһарга сыһыарбыт, нэһилиэк биир түс-бас, тумус туттар киһитэ, олохтоох самодеятельность актыыбынай кыттыылааҕа, улахан буукубаттан суруллар Учуутал, Тренер Григорий Константинович Дьячковскай. Бу...
Икки кэнтиниэн күүстээхтэригэр
Спорт | 26.04.2021 | 09:09
Икки кэнтиниэн күүстээхтэригэр
Айаал Азияны аймыыр Ааспыт өрөбүллэргэ Алматы куоракка Азия чемпионата ыытылынна. Маннык түһүлгэҕэ сахаттан кыһыл көмүс мэтээли бастакынан Леонид Спиридонов 2006 сыллаахха 66 кг ылары ситиспитэ. Кини Азиятааҕы оонньууларга боруонсаҕа тиксэн турар. Орто ыйааһыҥҥа Семен Семенов иккитэ призердаабыта.  Ол гынан саамай элбэх мэтээли сахалартан  баар-суох бухатыырбыт Айаал Лазарев хомуйбута. Кини саамай...