Оҕо айымньытын дьиэтин уонна 5 №-дээх ДЮСШ өрөмүөннэрин Евгений Григорьев тус бэйэтинэн хонтуруоллуур

Ф.И. Авдеева аатынан Оҕо айымньытын дьиэтэ уонна 5 №-дээх оҕо спорт оскуолата «Азия оҕолоро» Оонньууларынан өрөмүөннэнэ тураллар.

«Ф.И. Авдеева аатынан Оҕо айымньытын дьиэтигэр эркинэ оҥоһуллар, ис үлэ барар, антитеррористическай уонна баһаартан сэрэхтээх буолуу систиэмэлэрэ туруоруллаллар. 5 №-дэээх ДЮСШҕа улахан үлэ ис өрөмүөнүгэр барар. Таһын эһиил оҥоруохпут», – диэтэ Евгений Григорьев.
«Азия оҕолоро» Оонньуулар кэмнэригэр Оҕо айымньытын дьиэтигэр «Го» остуол оонньуутун күрэхтэһиилэрэ буолуохтара, маны сэргэ манна судьуйалар үлэлиэхтэрэ.

Евгений Григорьев Оҕо айымньытын дьиэтин өрөмүөнүн билсэн баран, кэккэ этиилэри киллэрдэ.
5№-дээх оҕо спорт оскуолатын өрөмүөнэ эмиэ түмүктэнээри турар. Бэлиэтээн эттэххэ, VIII-с «Азия оҕолоро» Оонньууларынан Дьокуускайга 9 ДЮСШҕа хапытаалынай өрөмүөн ыытыллар (№1а, 1б, №2, №3, №5, №8, №4а, №4б, № 6). Бу нэдиэлэ бүтүүтэ-кэлэр нэдиэлэҕэ үлэ барыта түмүктэнээри турар. 
Оҕо спорт оскуолаларын өрөмүөнүгэр куорат бүддьүөтэ быйыл 100 мөл. солк. тыыран турар. Үлэ уопсай суумата – 290 мөл. солк. курдук. ДЮСШлар өрөмүөннэрэ быйылгынан тохтообот, эһиил эмиэ салҕаныаҕа, диэн иһитиннэрэр Олохтоох дьаһалта пресс-сулууспата.