Нуучча театрын үлэтэ тохтоото

Нуучча театра 2 нэдиэлэҕэ үлэтин тохтоторго күһэлиннэ. Официальнай сайтка иһитиннэрбиттэринэн, айар кэлэктиип үлэһиттэрин ортолоругар коронавирус дьаҥынан ыалдьыбыт дьон көстүбүт. 
«Биһиги 2 үлэһиппит ыарыйда, ол иһин труппа барыта хантаактааҕынан ааҕыллар. Бүгүҥҥү күн туругунан бары дьиэлэригэр изоляцияҕа олороллор. Театр үлэтэ 2 нэдиэлэҕэ тохтоото», – диэтэ театр дириэктэрин солбуйааччы Римма Саакян.

Кини этэринэн, артыыстар ыалдьыбыттарыгар ыам ыйын 11-16 күннэригэр гастроллаабыт Федор Волков аатынан Арассыыйатааҕы судаарыстыбаннай академическай театр туох да сыһыана суох. 
«Гастролга кэлбит артыыстар бары вакцинацияны ааспыт, ыспыраапкалаах дьон. Ону сэргэ дириэктэрбит кэлин төлөпүөнүнэн билсибитэ, ким да ыалдьыбатах», – диэтэ Саакян.
Гастроллуу кэлбит артыыстары кытта СӨ Ил Дархана Айсен Николаев уонна Дьокуускай куорат баһылыга Евгений Григорьев көрсүбүттэрэ. Дьокуускай куорат уокуруктааҕы дьаһалтатын пресс-сулууспатыгар олохтоох артыыстар ыалдьыбыттар диэн бигэргэтэн этэллэр. 
«Кэлии артыыстар бары быһыы ылбыт уонна ыспыраапкалаах дьон этилэр. Евгений Григорьев кинилэри эрэ кытта көрсүбүтэ, Роспотребнадзор өттүттэн киниэхэ туох да бобуу суох. Баһылык вакцинацияны ааспыт киһи, туруга үчүгэй», – дииллэр пресс-сулууспаҕа.
Театр сайын саҕаланыыта, харантыын бүттэ да, аһыллыахтаах. Бүгүҥҥүттэн театр дьиэтигэр вакцинация пууна аһыллар.