26.01.2024 | 13:39

Ньурбаҕа – төрүт сирбэр

Быйыл кыһын тохсунньу ыйга төрөөбүт төрүт сирбэр, иитиллибит ийэ дойдубар Ньурбаҕа баран кэллим. Төрөөбүт буор тардыыта күүстээх даҕаны буолар.
Ньурбаҕа – төрүт сирбэр
Ааптар: Светлана Самсонова, Кэбээйи, Мукучу
Бөлөххө киир

Төһө даҕаны кэлбэтэҕим ырааттар, дойдум ил гынар чэбдик, тымныы салгынынан иэдэспин хаарыйан, ытыһын үрдүгэр түһэрэн хам кууһан ылла, симиктик мичээрдии көрүстэ. Ньурба куората уруккутунааҕар лаппа тупсубут, килбик кыыс оҕолуу кэмчиэрийэ киэркэйбит. Саҥа эбийиэктэр тутуллан үлэҕэ киирбиттэрэ хараҕы үөрдэр-көтүтэр. Хардыы ахсын тэрилтэ, маҕаһыын арааһа, эмтиэкэлэр, атыы-тутуу ырыынага...
Саҥа дьыллааҕы уһун өрөбүл кэнниттэн, эдьиийбэр көмө-тирэх буолан, туһааннаах тэрилтэлэргэ тиийэ сырыттыбыт. Туох да диэбит иһин, киһи барахсан бу орто туруу дьаҕыл дойдуга кыһалҕата элбэх буоллаҕа. Ол курдук МФЦ-га, сбербааҥҥа сылдьан, наҕыл, холку үлэһиттэр дуоспуруннаахтык быһааран, докумуону толорорго лоп-бааччы ыйан-кэрдэн биэрэллэрин бэлиэтии көрдүм. Маннык тэрилтэлэргэ үксүн эдэрдэр үлэлииллэрэ кэрэхсэтэр.


Оттон поликлиникаҕа тиийбиппитигэр, ханна да буоларын курдук, сарсыарда эрдэттэн көрдөрүнэр дьон көрүдүөргэ толору. Ол эрээри манна тустаах быраастарга инникиттэн суруттаран кэлэр буоланнар, уочарат былдьаһан мөккүһүү эҥин диэн суоҕун кэриэтэ. Өскөтүн төлөпүөнүнэн эрдэ этэн суруттарбатах буоллаххына, регистратураҕа кэлэн эмиэ (күнүн, чааһын ыйан туран) суруйтарыахха сөп.
Ньурба поликлиниката тигинэччи үлэлии турар, үрүҥ халааттаах аанньаллар дьон доруобуйатын көрөн-истэн эмтииргэ кыһаналлар. Биһиги травматолог, хирург, онколог, эндокринолог, терапевт, дерматолог быраастарга киирэ сырыттыбыт. Барыта дьип-дьап, олохтоох нэһилиэнньэ кэлэн көрдөрүнэригэр сөптөөх усулуобуйа тэриллибитэ харахха быраҕыллар. Маны сэргэ сорох исписэлиистэр атын сиртэн ананан кэлэн үлэлии сылдьаллар эбит диэн көрдүм. Ол, арааһа, анал үөрэхтээх үлэһит тиийбэтиттэн буолуо диэн сабаҕалыыбын. Оттон стоматология кабинетыгар уонна зуботехническай лабораторияҕа саха уолаттара үлэлии туралларын  көрөммүн, санаам көтөҕүллэн, тутум үрдээтим. Стоматолог тииспин көрөн-истэн баран, сүбэ-ама биэрдэ, атаҕа хаалбытын туурдар диэтэ. Кистэл буолбатах, киһи барыта куттанар буолуохтаах тииһин туурдарарын. Мин эмиэ чаҕыйаммын уһата-кэҥэтэ сылдьыбытым. Хата, укуол биэрэн олордо түһэн баран, быраас уол, миилэбин ханан да таарыйбакка, ыарытыннарбакка эрэ, тууран кэбистэ. Мин, харахтан сыыһы ылбыттыы, чэпчии түстүм. Үөрүүбэр буолан, уолум аатын ыйыппакка хаалбыппын. Маннык доруобуйа атын да сэдэх эйгэтигэр сахабыт ыччаттара, анал үөрэхтээх буоланнар, эмтээн–томтоон туһаны аҕалыахтара диэн эрэл санаалаах поликлиникаттан таҕыстым.


Маны сэргэ Энергетиктэр кыбаарталларыгар турар Ньурба киин эмтиир балыыһатын хирургия отделениетыгар тустаах үлэлэригэр олус бэриниилээх, хас биирдии ыарыһахха болҕомтолоох, эппиэтинэстээх исписэлиистэр, сиэстэрэлэр, санитаркалар үлэлии сылдьалларын бэлиэтиир тоҕоостоох. Кинилэр кыһамньыларынан төһөлөөх эдэр да, эмэн да киһи үтүөрэн, этэҥҥэ буолан тахсыбыта буолуой?!

Ньурба быраастарыгар, үтүөкэн үлэһиттэргэ барҕа махталбын тиэрдэбин. Дьоҥҥутун-сэргэҕитин өрүүтүн аламаҕай, сылаас сыһыаҥҥытынан араҥаччылыы, харыстыы-харыһыйа, үтүөрдэ туруҥ диэн баҕа санаа бастыҥын аныыбын.

Сонуннар

Ордук ааҕаллар

Истиҥник санаан
Дьон | 05.07.2024 | 20:38
Истиҥник санаан
(Учууталбар Раиса Реасовна Кулаковскаяҕа ананар)
Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Светлана Дьяконова: «Саҥаттан ыал буолан эрэр курдукпут...»
Дьон | 04.07.2024 | 16:00
Светлана Дьяконова: «Саҥаттан ыал буолан эрэр курдукпут...»
Быйылгы халаан Хатырык нэһилиэнньэлээх пуунун олох үөйбэтэх өттүттэн ылан, олохтоохтору ууга-уокка түһэрбитин ааһан, уйулҕаларыгар да охсуу ыллылар, күн бүгүн ол содулун туоратыыга күүскэ үлэлииллэр, кэлэн ааспыт иэдээни оһоруналлар.   Светлана Васильевна Дьяконова, Хатырык олохтооҕо, биэнсийэлээх, култуура эйгэтигэр 35 сыл үлэлээн, “Култуура туйгуна” бэлиэлээх үлэ бэтэрээнэ, бүгүн ааҕааччыларга халаан иэдээнин туһунан кэпсиир:...
Туймаада ыһыаҕын туһунан дьон санаата
Сонуннар | 04.07.2024 | 14:00
Туймаада ыһыаҕын туһунан дьон санаата
Туймаада ыһыаҕа ыһыллар Үс Хатыҥ сирэ-уота куорат кииниттэн төһө да ыраах турдар, норуот уустук айаны, араас мэһэйдэри аахсыбакка, бииргэ мустар үөрүүтүн билээри, алгыс баһын сыалаары, кэлэр сылга күүс эбинээри, быйыл номнуо үйэ чиэппэриттэн ордук саараабакка дьулуһар. Быйылгы ыһыах тэрээһинин туһунан норуот санаатын билсээри, ыйынньыктарынан сирдэтэн, түһүлгэлэринэн хаамтыбыт.   Бастатан туран, оптуобус....