Норуоттар доҕордоһууларын бэстибээлигэр биир дойдулаахтарбыт кытыннылар

Тэрээһини Бүтүн Арассыыйатааҕы инбэлииттэр уопсастыбалара уонна   Нижегородскай уобалас Александр Невскай аатынан тэрилтэтэ иилээн-саҕалаан ыыттылар. 

Бу тэрээһиҥҥэ Саха сириттэн 6 киһи тиийэн кыттыыны ылла. Манна уопсайа 250 киһиттэн тахса кыттааччы, Арассыыйа 39 араас регионуттан муһуннулар. Кинилэр пауэрлифтинг, дартс, скандинавскай хаамыы, саахымат, остуол оонньуута (шаффлборд, джакколо) көрүҥҥэ күрэхтэстилэр.

Түмүккэ пауэрлифтинг көрүҥэр Дайана Енохова (Алдан улууһа) 1 миэстэни ылла.

Култуурунай бырагыраамаҕа кэлээскэлээх үҥкүүгэ Лилия Егорова  "Кыталык" үҥкүүтүн  толорон бэстибээл кыттааччыларын биһирэбилин ылла. Тэрээһин биир сүдү бырагырааматынан кыттааччылары куорат иһинэн экскурсияҕа сырытыннарыы уонна «Алдан» теплоходка хатааһылатыы буолла, кыттааччыларга үөрүүнү бэлэхтээтэ.

 Саха сирин хамаандата улахан ис сүрэхтэн махталын тириэрдэр, Арассыыйа иһинээҕи бэстибээлгэ кыттыыны ылбытынан киэҥ туттар. Түгэнинэн туһанан өрөспүүбүлүкэтээҕи инбэлииттэр уопсастыбаларын бэрэссэдээтэлигэр Лебедева Ирина Васильевнаҕа, Дьокуускай аэропордун үлэһиттэригэр  махталларын тиэрдэллэр.