16.04.2021 | 12:45

Норуот куоластааһыныгар кыттыаҕыҥ, Дьокуускайбытын тупсарыаҕыҥ!

Муус устар 26 күнүттэн ыам ыйын 30 күнүгэр диэри уопсастыбаннай эйгэ бастыҥ бырайыактарын быһаарар Бүтүн Арассыыйатааҕы онлайн куоластааһын саҕаланар. Кыайыылаах эһиил федеральнай бүддьүөттэн үбүлэнэр.
Норуот куоластааһыныгар кыттыаҕыҥ, Дьокуускайбытын тупсарыаҕыҥ!
Ааптар: Киин Куорат
Бөлөххө киир

Тапталлаах куораппытыгар Кыайыы Паарката тутуллуохтаах уонна Сайсары күөлүгэр, Ийэ скверигэр тупсарыы үлэтэ ыытыллыахтаах. Ол федеральнай бүддьүөттэн үбүлэниэхтээх. Бу бырайыактар олоххо киирэллэригэр нэһилиэнньэ төһүү күүс, көмө, тирэх буолуоҕа. Ол хайдах? Эн, мин, кини – бары норуот куоластааһыныгар кыттыахтаахпыт уонна кыайыахтаахпыт.

Олохтоох дьаһалта  za.gorodsreda.ru сайтка киирэн көхтөөхтүк кыттаргытыгар ыҥырар. Нэһилиэнньэ биир уопсастыбаннай эйгэни талар кыахтаах – Кыайыы Пааркатын эбэтэр Сайсары күөлүн уонна Ийэ скверин тупсарыыны. Элбэх куолаһы ылбыт эбийиэк 2022 сылга  «Олорор дьиэ уонна куорат эйгэтэ» национальнай бырайыак «Куорат эйгэтин табыгастаах оҥоруу» федеральнай бырагырааматынан олоххо киириэҕэ.

“Инникитин уопсастыбаннай эйгэ сайдарыгар олохтоохтор санааларын билиэхтээхпит, тоҕо диэтэххэ бу бырайыактар олохтоохторго ананар. Платформа бэйэтэ туспа архыып буолуоҕа. Олоххо киирбит уонна тупсарыллыахтаах    эбийиэктэри онно киирэн көрөр буолуохпут”, – диэтэ куорат баһылыгын солбуйааччы Алексей Корнилов.  

 

Ким кыттыан сөбүй?

Норуот куоластааһыныгар «Госуслуги» порталга регистрацияны ааспыт дьон кытталлар (14-тэн үөһэ саастаах оҕолор эмиэ).  

Хайдах куоластыыбыт?

Олорор куораккытын (нэһилиэккитин) талаҕыт, куоластааһыҥҥа киирбит эбийиэктэри булаҕыт.

«Госуслуги» киирэҕит эбэтэр регистрацияланаҕыт. Формаҕа араспаанньаҕытын, ааккытын, аҕаҕыт аатын, төрөөбүт күҥҥүтүн-дьылгытын, олорор сиргитин, электроннай почтаҕыт аадырыһын, төлөпүөҥҥүт нүөмэрин суруйаҕыт.

Испииһэктэн ханнык уопсастыбаннай эйгэ тупсарыллыахтааҕын талаҕыт.  

Куоластааһын түмүгэ порталга тахсар. Элбэх куолаһы ылбыт бырайыак эһиил федеральнай бүддьүөттэн үбүлэнэр.

«Кыайыы Паарката»

Киин куорат олохтоохторо сынньаналларыгар аналлаах аныгы паарка дизайн-бырайыагын билсиҥ. Бу эбийиэк Аҕа дойду Улуу сэриитигэр кыттыбыт биир дойдулаахтарбыт хорсун быһыыларын, тыыл бэтэрээннэрэ, сэрии кэмин оҕолоро харах уулаах Кыайыы туһугар күнүстэри-түүннэри үлэлээбиттэрин кэрэһилиир, үйэтитэр буолуоҕа.

Былырыын Улуу Кыайыы 75 сылынан Дьокуускай куоракка “Кыайыы Паарката” саҥа уопсастыбаннай эйгэҕэ өйдөбүнньүк стелатын үөрүүлээх аһыллыыта буолан ааспыта. Бу эбийиэк 2022 сылга, өрөспүүбүлүкэ 100 сылыгар үлэҕэ киирэрэ былааннанар.

Дизайн-бырайыак быһыытынан комплекска киин болуоссат, сүүрэргэ аналлаах, бэлэсипиэт суоллара, оҕолор оонньуур зоналара, спордунан дьарыктанар зоналар, фуд-корт, амфитеатр, о.д.а. баар буолара былааннанар.  

Тутуу икки түһүмэҕинэн ыытыллыаҕа. Сирэ-уота тупсарыллыахтаах, сырдатыллыахтаах, уу сүүрэр, канализация ситимнэрэ оҥоһуллуохтаах, саҥа эбийиэктэр тутуллуохтаахтар, оонньуур оборудованиелар туруоруллуохтаахтар, бэлэсипиэт суоллара тэлгэниэхтээх, скейт-паарка, гриль-зона баар буолуохтаах.

Сайсары күөл уонна Ийэ скверэ

Бу саас пресс-туурга Евгений Григорьев (оччолорго Дьокуускай куорат баһылыгын эбээһинэһин толорооччу): “Сайсары – Туймаада туонатын ытык-бэлиэ сирэ. Манна “Куорат эйгэтин табыгастаах оҥоруу” бырагырааманан үгүс үлэ ыытыллыахтаах. Киин куорат олохтоохторо, ыалдьыттара өйдүүн-сүрэхтиин талаһар сирдэрэ буолуохтаах”, – диэбитэ.

Бу эбийиэккэ тупсарыы үлэтэ ыытыллыахтаах, суоллара уонна тротуардара хапытаалынайдык өрөмүөннэниэхтээх, саҥа эбийиэк элбэтиллиэхтээх, киирэр суол, сатыы дьон сылдьар сирдэрэ, спортивнай балаһааккалара сырдатыллыахтаах, көҕөрдүү үлэтэ күүһүрүөхтээх.

Дизайн-бырайыак быһыытынан Ийэ скверэ нэһилиэнньэ бары араҥата өйдүүн-сүрэхтиин сынньанар сиригэр кубулуйуохтаах. Куорат олохтоохторо манна кыралыын-улаханныын, эдэрдиин-эмэнниин үөрэ-көтө кэлиэхтээхтэр.

Оонньуур зоналарга оҕолоох ыаллар сөбүлээн сылдьыахтара. Сылаас павильоҥҥа уонна кафеҕа ыччат тоҕуоруһуоҕа.Всероссийское голосование по выбору объектов благоустройства на 2022 год

Сонуннар

Ордук ааҕаллар

Замполит Александр:  «Эр санаалаах боотурдары төрөтөр Саха сиригэр сүгүрүйэбин»
Дьон | 12.07.2024 | 12:00
Замполит Александр: «Эр санаалаах боотурдары төрөтөр Саха сиригэр сүгүрүйэбин»
Бу сурук кэлбитин туһунан миэхэ Уус Алдан улууһун социальнай политика салаатын үлэһитэ, хаһыаппар сырдаппыт, анал байыаннай дьайыы саҕаланыаҕыттан үлэлии сылдьар Наталья Охлопкова от ыйын 3 күнүгэр эрийэн, хаһыаккар таһаарыаҥ дуо диэбитин тута сөбүлэспитим. Онон, сурук хайдах баарынан тылбаастаан, ааҕааччыларбар тиэрдиэм, Саха сирэ дьоруойдарын билиэхтээх!   “Наталья, дорообо! Мин аатым Александр. Мин...
Истиҥник санаан
Дьон | 05.07.2024 | 20:38
Истиҥник санаан
(Учууталбар Раиса Реасовна Кулаковскаяҕа ананар)
Светлана Дьяконова: «Саҥаттан ыал буолан эрэр курдукпут...»
Дьон | 04.07.2024 | 16:00
Светлана Дьяконова: «Саҥаттан ыал буолан эрэр курдукпут...»
Быйылгы халаан Хатырык нэһилиэнньэлээх пуунун олох үөйбэтэх өттүттэн ылан, олохтоохтору ууга-уокка түһэрбитин ааһан, уйулҕаларыгар да охсуу ыллылар, күн бүгүн ол содулун туоратыыга күүскэ үлэлииллэр, кэлэн ааспыт иэдээни оһоруналлар.   Светлана Васильевна Дьяконова, Хатырык олохтооҕо, биэнсийэлээх, култуура эйгэтигэр 35 сыл үлэлээн, “Култуура туйгуна” бэлиэлээх үлэ бэтэрээнэ, бүгүн ааҕааччыларга халаан иэдээнин туһунан кэпсиир:...
Туймаада ыһыаҕын туһунан дьон санаата
Сонуннар | 04.07.2024 | 14:00
Туймаада ыһыаҕын туһунан дьон санаата
Туймаада ыһыаҕа ыһыллар Үс Хатыҥ сирэ-уота куорат кииниттэн төһө да ыраах турдар, норуот уустук айаны, араас мэһэйдэри аахсыбакка, бииргэ мустар үөрүүтүн билээри, алгыс баһын сыалаары, кэлэр сылга күүс эбинээри, быйыл номнуо үйэ чиэппэриттэн ордук саараабакка дьулуһар. Быйылгы ыһыах тэрээһинин туһунан норуот санаатын билсээри, ыйынньыктарынан сирдэтэн, түһүлгэлэринэн хаамтыбыт.   Бастатан туран, оптуобус....