Норуот күүһэ – көмүөл күүһэ
Бу күннэргэ хоту дойду чулуу булчута уонна балыксыта Павел Баягантаев Черскэй бөһүөлэгин аттыгар бааһырбыт Канада туруйатын булан, социальнай ситимнэргэ бэрт сэргэхсийиини таһаарда.
life14.ru сайт туруйаны Дьокуускай куоракка аҕаларга көмөлөһүөҕүҥ диэн ыҥырыытыгар «АРКТИК КАПИТАЛ» хампаанньа генеральнай дириэктэрэ, Арктика уокуругуттан дьокутаат Матвей Евсеев тылланан, суолун ороскуотун уйунан аҕалтарда.
Туруйа эмтээһинин уонна эпэрээссийэтин бизнесмен Станислав Галенчиков, уопсастыбанньык Афанасий Егоров уонна Саргылана Степановна С., оттон айаннаан кэлбит килиэккэтин Аллараа Халыма улууһун баһылыга Валерий Сентяков төлөөбүттэр.
Көтөр Черскэйтэн киин куоракка «Орто Дойду» зоопааркаҕа кэлиэр диэри хас түһүмэҕин ыйан-кэрдэн салайбыт киһинэн суруналыыс, хоту сир олохтооҕо Сардана Сивцева буолар.
Туруйаны хотуттан сөмөлүөтүнэн Наталия Чьямова арыаллаан аҕалла. Кини туруйа төһө да эчэйбит буоллар, сэниэлээҕин, оннооҕор тоҥсуйа сатаабытын кэпсиир.
Үтүө санаалаах дьон көмөлөрүнэн туруйа Дьокуускайы этэҥҥэ булан, «Орто Дойду» зоопааркаҕа тиксэриллэн, бэтэринээр көрөн-истэн, хата, саанан ытыллыбатаҕа быһаарыллыбыт. Биир атаҕар сүһүөҕэ тахсыбыт, иккиһигэр сүһүөҕэ тостубутун рентгеннээн быһаарбыттар, тута эппэрээссийэ оҥорбуттар. Специалист эппитинэн, итинник тостуу хараҥаҕа көтөн кэлэн чараас мууска түспүтүттэн буолуон сөп үһү.
Ити курдук, үтүө санаалаах дьон түмсэн, Саха сирин кыһыл кинигэтигэр киирбит сэдэх көтөр быыһанна. Норуот күүһэ – көмүөл күүһэ.
Сонуннар
Ордук ааҕаллар
