14.01.2022 | 20:42

Николай Тарскай чемпионатыгар

Николай Тарскай чемпионатыгар
Ааптар: Баһылай Посельскай

Олунньу ыйга Дьокуускайга Уһук Илин регионун көҥүл тустууга чемпионатын көбүөрэ тэлгэниэхтээх. Онно кыттарга сүүмэрдэммит хамаандаҕа киирэр  суолталаах быйылгы Саха өрөспүүбүлүкэтин Николай Тарскай кэриэһигэр Аллараа Бэстээххэ буолан ааспыт биирдиилээн уонна хамаанданан бастыыр иһин чемпионакка 29 хамаандаттан 293 бөҕөс көбүөргэ таҕыста. 

Ыйааһын аайы аҕыс иһигэр киирбиттэр Бороҕоҥҥо буолар Саха сирин норуоттарын VIII-с Спортивнай оонньууларыгар кыттарга бэйэлэрин хамаандаларыгар путевка ылаттаатылар. Кыра ыйааһыннарга отуттан тахсалыы, улахан ыйааһыннарга сүүрбэттэн тахсалыы кыттааччылар бааллара хапсыһыылар тыҥааһыннаахтык барыыларын үөскэттэ. Эдэрдэр тахсыылаах тустуулара түһүлгэни улаханнык сэргэхситтэ. Саҥа ааттар күлүмүрдээтилэр. 
Көрөөччүлэр улахан болҕомтолорун тарпыт 74 кг хапсыһыы бүтэһигинэн буолла. Уопуттаах маастар, Арассыыйа хас да төгүллээх призера, аан дойду Кубогын кыайыылааҕа Виктор Рассадин (Орто Халыма) уонна аан дойду ыччаттарын призера, итиэннэ мэҥэлэр эрэ буолбакка бүтүн өрөспүүбүлүкэ инники эрэлэ, 20 саастаах Станислав Свинобоев хайалара кыайарыгар таайтарыылаах, саамай күүтүллүбүт хапсыһыы. Тустууну сэргээччилэр эдэр бөҕөскө ыһыытаан-хаһыытаан улаханнык “ыарыйдылар” эрээри, “истиэнэ” көмөлөспөтө. Утарсааччытыттан уон биир сыл аҕа саастаах Виктор Рассадин 7:1 кыайыыны ситиһэн, бу күннээххэ туйгун туругар сылдьарын көрдөрдө. Бу ыйааһыҥҥа Чурапчыттан Арассыыйа 2016 сыллаах чөмпүйүөнэ Егор Пономарев, Албан Аввакумов (ХИФУ) үһүс миэстэлэнэн, хамаандаларыгар наадалаах очколары аҕаллылар.
Күүстээхтэр финалга күөн көрүстүлэр. 57 кг Сунтаартан 17 саастаах Лев Павлов финалга аан дойду уонна Европа ыччаттарын кыайыылааҕын Петр Копылову 9:2 кыайыыта соһуччу көстүүнэн буолла, Айаал Бедолюбскай (Уус Алдан), Айсиэн Винокуров (Мэҥэ Хаҥалас) үһүстээтилэр; Аан дойду оҕолорун боруонса призерунан буола сылдьыбыт Петр Константинов (ХИФУ-Бүлүү) Миндиашвили турнирын кыайыылааҕын Дьулус Федотовы (Үөһээ Бүлүү) 4:3 баһыйда, Артем Слепцов (Муома), Яков Павлов (Томпо) үһүстэр; Европа боруонса призера Чурапчыттан Эдуард Григорьев 65 кг Тааттаттан Семен Владимировка түөрт баалга хотторон иһэн, кэлин аһыллан, уон баалы субуруччу ылла уонна 14:4 ыраас техническэйинэн хотто, үһүс миэстэ Ньургун Александров (Үөһээ Бүлүү), Айхаан Антонов (Ньурба); 70 кг Дьааҥыттан Айсен Потапов Константин Капрынову (Чурапчы) 3:2, үһүс Вальтер Владимиров (Горнай), Николай Сивцев (Мэҥэ Хаҥалас); 79 кг Константин Власов (Мэҥэ Хаҥалас) Үөһээ Бүлүү күүстээх бөҕөһүгэр Тимур Николаевка хотторон иһэн, хапсыһыы түмүктэнэрэ аҕыйах сөкүүндэ хаалбытыгар охторон, 3:2 кыайыыны ситиһэн, биир дойдулаахтарын үөртэ, Ларион Андреев (Хаҥалас), чаҕылхай тустуулары көрдөрбүт Орто Халыматтан Андриан Ленскэй үһүс миэстэлэннилэр. 86 кг Ньурба чиэһин көмүскээбит Амма ыччата Герман Устинов бу иннинээҕи “бэстилиэт” диэн сөбүлээн туттар албаһынан кыраһыабай быраҕыылары оҥортообут Сунтаар бөҕөһө Револий Самсоновы 2:0 хотто, Олег Чернов (Дьокуускай), Софрон Софронов (Мэҥэ Хаҥалас) үһүс; икки бастыҥнар Үөһээ Бүлүүттэн Иннокентий Иннокентьев уонна Намтан Игорь Софронеев 92 кг утарыта тахсыбыттарыгар, көҥүл тустуу уопуттаах маастара Иннокентьев 8:1 кыайда, Сунтаартан Владимир Данилов, Тааттаттан Александр Халыев үһүс миэстэлэннилэр. 97 кг Ньургун Сергин (Мииринэй) утарсааччыта Никита Софронов (Чурапчы) бырааһынан уһуллан туста тахсыбатаҕынан, кыайыыны быһа ылла. Николай Николаев (Бүлүү), Сергей Семенов (Нам) үһүс буоллулар; саамай ыарахан 125 кг Никита Хабаров (ХИФУ-Муома) Эдуард Максимовы (Горнай) 1:1 бүтэһик баалы ылбытынан кыайда, Леонид Попов (Таатта), Андрей Аронов (Мииринэй) үһүс миэстэлэри ылаттаатылар.
Хамаанданан түмүккэ чемпионаты үрдүк таһымҥа тэрийэн ыыппыт мэҥэ хаҥаластар Н.Н. Тарскай Кубогын аан бастаан ылары ситистилэр. Чурапчылар иккис, сунтаардар үһүс буолуталаатылар.

Сонуннар

Ордук ааҕаллар

Оҕуруот аһын олордооччуларга саҥа субсидия көрүллүөҕэ
Сонуннар | 18.05.2022 | 15:00
Оҕуруот аһын олордооччуларга саҥа субсидия көрүллүөҕэ
«Развитие овощеводства и картофелеводства» саҥа федеральнай бырайыак чэрчитинэн субсидия бэриллэр буолуоҕа. Манан дьоҕус уонна орто предпринимателлэр, маны сэргэ, “самозанятайдар” уонна кэтэх хаһаайыстыбалаах дьон эмиэ туһаныахтарын сөп. Ол курдук, судаарыстыба хортуоппуйу уонна да атын оҕуруот аһын олордуунан дьарыктанар оҥорон таһаарааччылары өйүүр миэрэлэри кэҥэтиэҕэ. Бу туһунан уураахха Арассыыйа бырабыыталыстыбатын бэрэссэдээтэлэ Михаил Мишустин...
Ньургуһуну эмкэ туһаныы
Сынньалаңңа | 12.05.2022 | 12:30
Ньургуһуну эмкэ туһаныы
Тоҥ буору тобулан тахсар хорсун сибэкки ньургуһун барахсан олоххо тардыһыытынан, кэрэ көстүүтүнэн эрэ буолбакка, араас ыарыыны эмтиир кыахтааҕынан өбүгэ саҕаттан аатырар. Аныгы үйэ киһитэ ньургуһунан хайдах эмтэниэн сөбүй? Бу туһунан айылҕаттан айдарыылаах норуот эмчититтэн туоһуластыбыт. Юлия Юрьевна Николаева – норуот эмчитэ, “Арчы дьиэтин” иһинэн үлэлиир өбүгэ үгэһин, сиэрин-туомун дьоҥҥо тарҕатар,...
Тааттаҕа музей тэриллиитэ
Куорат олоҕо | 14.05.2022 | 15:00
Тааттаҕа музей тэриллиитэ
Кэлэр сэрэдэҕэ, ыам ыйын 18 күнүгэр, аан дойдуга Музей күнэ бэлиэтэнэр. Быйыл Таатта улууһугар кыраайы үөрэтэр музей тэриллибитэ 77 сыла.   Музей тэриллиитэ норуодунай худуоһунньук И.В. Попов аатын кытта ыкса ситимнээх. Дэгиттэр дьоҕурдаах, хас да экспедицияҕа сылдьыбыт (бастакы Сибиряковскай экспедиция 1894-96 сс.), баай матырыйаалы муспут буолан да буолуо, 1938 с. саҕалаан...
Сааскы Ньукуолун — күөххэ үктэнии өрөгөйө
Тускар туһан | 20.05.2022 | 14:00
Сааскы Ньукуолун — күөххэ үктэнии өрөгөйө
Ыам ыйын 22 күнэ – сааскы Ньукуолун. Кыһыҥҥы Ньукуолун ахсынньы 19 күнүгэр бэлиэтэнэр (День святого Николая Чудотворца) Таҥара дьиэтин  бырааһынньыга.   Саха дьонугар былыр-былыргыттан сааскы Ньукуолун күнэ олус ытыктанар, улахан суолталаах, күүтүүлээх. Бу күн уһун кыһыны этэҥҥэ туораан, күөххэ үктэнии үөрүүтэ-өрөгөйө буолар. Мөккүөрдээх соҕус да буоллар, бу күнү сорохтор өссө саха...