Наука дьоҕус академиятын эдэр академиктарыгар истипиэндьийэ олохтонно

Николаев-киин пресс-сулууспата иһитиннэрбитинэн, оҕолорго дастабырыанньалары туттарыы үөрүүлээх тэрээһинэ муус устар 28 күнүгэр “Кэскиллээх лидердэр” форум чэрчитинэн буолбут. «Сириус» үөрэтэр киин халыыбынан тэриллибит өрөспүүбүлүкэ талааннаах оҕолорун өйүүр уонна таһаарар регионнааҕы киин базатыгар саҥа ааттар билиннилэр. Кинилэр номнуо Саха сирин научнай сайдыытыгар бэйэлэрин кылааттарын киллэрэ сылдьаллар.

“Сыл аайы аһаҕас куонкурус түмүгүнэн өрөспүүбүлүкэ 200 бастыҥ үөрэнээччитин талаллар. 100 бастыҥ үөрэнээччи Наука дьоҕус академиятын чилиэнин аатын сүгэр, өссө 100 үөрэнээччи чилиэн-кэрэспэдьиэн дастабырыанньатын тутар. Быйыл аһаҕас куонкуруска 490 сайаапка киирбит. Оҕолорго саастарынан хааччах диэн суох, онон сайаапканы 1-11 кылааска диэри үөрэнэр оҕо ыытар бырааптаах. Кинилэр бары регионнааҕы, Бүтүн Арассыыйатааҕы, норуоттар икки ардыларынааҕы научнай-чинчийэр куонкурустар, кэмпириэнсийэлэр, олимпиадалар кыайыылаахтара, призердара. Бу куонкурус өрөспүүбүлүкэҕэ научнай-технологическай элитэни тэрийэргэ улахан суолталаах», - диэн СӨ Наука дьоҕус академиятын ректора Василий Павлов бэлиэтээтэ.

- Кыра саастарыттан научнай-чинчийэр үлэнэн үлүһүйэр талааннаах оҕолорго көмөлөһөр уонна кинилэри өйүүр хайаан да наада. Бу оҕолор инникитин олохторун науканан, аныгы технологиянан дьарыктаныыга аныахтарын сөп,- диир СӨ Наука Академиятын вице-бэрэсидьиэнэ Сергей Попов.

Н.К.Макаров  аатынан Чурапчытааҕы гимназия 11-с кылааһын үөрэнээччитэ Николай Хомподоев бүгүн Наука дьоҕус академиятын чилиэнин дастабырыанньатын тутта: «Мин былырыын Наука дьоҕус академиятын чилиэн-кэрэспэдьиэнэ буолбутум, оттон быйыл дьиҥнээх чилиэн дастабырыанньатын туттум. «Меня оценят в ХХIII веке» диэн Бүтүн Арассыыйатааҕы научнай-чинчийэр уонна айар үлэлэрдээх  куонкуруска кыайыылаах тахсыбытым. Гимназиябын бүтэрдэхпинэ, ХИФУ мэдиссиинэ институтугар туттарсар уонна тиит мас структуратын үөрэтэр научнай үлэбин салҕыыр санаалаахпын».

Өрөспүүбүлүкэтээҕи лицей-интэринээт 11-с кылааһын үөрэнээччитэ Артем Овчинников астрономияҕа Бүтүн Арассыыйатааҕы предметнэй олимпиада кыттыылааҕа: “Быйыл мин математика, физика олимпиадаларыгар, ону сэргэ астрономияҕа Ломоносов турнирыгар эмиэ кытынным. «Кэскиллээх лидердэр» форумнарын сөбүлээтим. Манна күн ахсын олус интэриэһинэй тэрээһиннэр, трениннэр ыытыллаллар. Холобур, бэҕэһээ Сайдыы институтун салайааччыларын, миниистирдэри кытта 2030 сылга диэри Саха сирин социальнай-экэнэмиичэскэй сайдыытын туһунан кэпсэппиппит. Мин үөрэххэ туттарсарбар хас даҕаны үрдүк үөрэх кыһатын талбытым, ол эрээри бастакы миэстэҕэ Москубатааҕы судаарыстыбаннай университет Астрономияҕа факультета турар, тоҕо диэтэххэ астрономия миигин олус күүскэ угуйар”.

Чилиэн-кэрэспэдьиэн аатын сүкпүт үөрэнээччилэргэ ый ахсын 2 тыһ. солкуобай көрүллэр, оттон дьиҥнээх чилиэн үрдүк аатын сүкпүт оҕолорго - ый ахсын 3 тыһ. солкуобай кээмэйдээх истипиэндьийэ. Бу истипиэндьийэ сыл устата төлөнөр.