08.03.2022 | 14:00

Нам таксистара Арсен Томскайга сурук бэлэмнииллэр

Нам таксистара Арсен Томскайга сурук бэлэмнииллэр
Ааптар: Киин Куорат

Бу күннэргэ Нам-Дьокуускай-Нам хайысханан айан сырыытын сүрүннүүр индрайвер сыһыарыыга уларыйыылар киирэннэр, үгүс киһи соһуйда. Тоҕо?

Индрайвердар бырыһыаннарын улаатыннаран кэбиспиттэрэ уонна версияларын уларыппыттара. Ол пассажирдар сакаас оҥороллоругар табыгаһа суох, биһиэхэ, суоппардарга  да харгыстары таһаара сырытта. Ол иһин индрайвердыы сылдьар уолаттары мунньан, биир быһаарыныы ыларга сананныбыт. Таарыччы билиҥҥи үлэлии сылдьар кэккэ боппуруостарбытыгар тохтоон кэпсэппиппит. Онно көрдөххө, индрайверынан дьарыктанааччы ыччат туох да буолунай эбит. Үлэ суоҕун бары билэбит. Аҥаардас таксилаан дьиэ кэргэттэрин иитэн, кредиттэрин, ипотекаларын төлөөн олорооччулар элбэхтэр. Онон хайдах даҕаны түмсүүлээх буолуоххайыҥ диэн сүбэлэспиппит. Итиэннэ индрайвер сыһыарыыга ким да киирбэт, атын ньыманы булуоххайыҥ диэн кэпсэппиппит.

Иккис күнүгэр индрайвердар бэйэлэрэ биһиэхэ сибээскэ тахса сылдьыбыттара уонна туох ирдэбиллээххитий, боппуруостааххытый, тугу сөбүлээбэккитий диэн ыйыталаспыттара. Итиэннэ опрос ыыппыттара, онно барытыгар эппиэттээбиппит. Бэнидиэнньиккэ эмиэ мустан, кэпсэтэн, быһаарыы ылыммыппыт, мунньахпытын боротокуоллаан бэлэмнээбиппит. Ол түмүгэр, боротокул быһыытынан, Арсен Томскайга бырыһыан улаатымыан наадатын туһунан биллэрбиппит.

Биллэрин курдук, бырыһыан улааттаҕына сыана эмиэ үрдүүр. Айан сыанатын 400 солкуобайга тутуоххайыҥ, бары өйдөһөн, түмсэн үлэлиэххэйиҥ диэн сурук бэлэмнээтибит. Үлэлиир буоллахха, таһымнаахтык үлэлиэххэ диэн мин бэйэм санаабын аһаҕастык эттим. Онуоха бары сөбүлэһэн, бэйэ-бэйэни өйөһүөххэ диэн биир санааҕа кэллибит.

Арсен Томскай дириҥ толкуйдаах, сайдыыны, дьоҥҥо туһалаах буолууну өрө туппут киһи, бу аҕыйах ахсааннаах сахаларга, биһиэхэ, бырыһыаны аһары үрдэппэтэ буоллар диэн баҕа санаалаахпыт. Бастаан эмискэ уларыйыы киирбитигэр дьон бары соһуйбута, дьиҥэр, индрайвербыт табыгастаах бөҕө этэ.

Уопсайынан, боротокуолга киирбиппитинэн элбэх эбиппит, барыта 49 киһи буолбута. Түмсүбүччэ элбэх боппуруоһу быһаарыстыбыт, үгүс эдэр дьон үлэлии сылдьарын биллибит. Бу көрсүһүүгэ көрдөхпүнэ, дьон түмсүөн наһаа баҕарар эбит. Бастакы мустууга элбэхтэр этэ, ону учуоттаабакка хаалбыппыт. Массыыналаах эрэ барыта сүүрэр эбит. Үөрдүбүтэ диэн, бары түмсүөхтэрин наһаа күүскэ баҕараллара көстөр, тылларыттан-өстөрүттэн да иһиттэххэ, сомоҕолостохпутуна ыарахаттары кыайыахпыт диэн санаалаахтар.

Түгэнинэн туһанан, «Сардаҥа» кинотеатр салалтатыгар махтаныахпыт этэ, чуолаан, Байбал Обутовка. Кини бары санитарнай ирдэбиллэри тутуһуннаран, сааланы көҥүллээтэ.

Сорох эдэр уолаттар тылларын тамаҕыттан иһиттэххэ, массыыналанан кылгас кэмҥэ сүүрэн баран тохтуом диэн санаалаахтар эбит. Холобура, бардым-кэллим, харчы ыллым диэх курдук быстах өйдөбүллээхтэр. Кинилэргэ таксист үлэтин сиһилии быһааран биэрдибит. Таксистыыр диэн ыарахан үлэ – дьону кытта үлэ. Нам олохтоохторун мэлдьи таһабыт, кинилэргэ дьиэ кэргэн кэриэтэ буолан хаалаҕын. Ыалдьыттарга гид курдук буолуохха наада, онон таксист үлэтин ымпыга-чымпыга элбэх. Массыынаҥ алдьаныа, бэйэҥ ыарыйдыҥ даҕаны, туох да көмүскэлэ суох хаалаҕын диэн өйдөттүбүт. Быстах кэмҥэ дьарыктанар буоллаххытына, атын суолу тутуһуоххутун наада диэн сүбэлээтибит.

Ону сорох эдэр уолаттар «кырдьык даҕаны оннук эбит» диэн санааларын эттилэр. Сотору кэминэн оптуобус сырыыта сөргүтүллүөҕэ дииллэр даҕаны, сырыы олохтоохтук оҥоһулларын улаханнык саарбахтыыбыт. Номнуо дьон бары дьиэлэриттэн айанныырга үөрэммиттэр уонна табыгастаах даҕаны. Айан сыанатын биир тэҥник тутар буоллахпытына, олохтоох дьаһалта, чуолаан, биһигини биир кэлим такси сулууспатыгар сыһыаран, хайысхабытын бигэргэтиэ эбит диэн бу түмсүү кэнниттэн сыанабыл оҥордубут. Тэҥ хайысханы тутуһан, биир санааҕа кэлиэ этибит.

Айан барыта бүтэһик уһугар сыанатыгар кэлэн тохтуур. Бириэмэтин чопчу быһааран үлэлээтэххэ, биир сүбэни буллахха, табыллыан сөп курдук дии саныыбын.

Аватар Мардьа Марха уола, «Эҥсиэли такси» сулууспа салайааччыт

Сонуннар

Ордук ааҕаллар

Оҕуруот аһын олордооччуларга саҥа субсидия көрүллүөҕэ
Сонуннар | 18.05.2022 | 15:00
Оҕуруот аһын олордооччуларга саҥа субсидия көрүллүөҕэ
«Развитие овощеводства и картофелеводства» саҥа федеральнай бырайыак чэрчитинэн субсидия бэриллэр буолуоҕа. Манан дьоҕус уонна орто предпринимателлэр, маны сэргэ, “самозанятайдар” уонна кэтэх хаһаайыстыбалаах дьон эмиэ туһаныахтарын сөп. Ол курдук, судаарыстыба хортуоппуйу уонна да атын оҕуруот аһын олордуунан дьарыктанар оҥорон таһаарааччылары өйүүр миэрэлэри кэҥэтиэҕэ. Бу туһунан уураахха Арассыыйа бырабыыталыстыбатын бэрэссэдээтэлэ Михаил Мишустин...
Ньургуһуну эмкэ туһаныы
Сынньалаңңа | 12.05.2022 | 12:30
Ньургуһуну эмкэ туһаныы
Тоҥ буору тобулан тахсар хорсун сибэкки ньургуһун барахсан олоххо тардыһыытынан, кэрэ көстүүтүнэн эрэ буолбакка, араас ыарыыны эмтиир кыахтааҕынан өбүгэ саҕаттан аатырар. Аныгы үйэ киһитэ ньургуһунан хайдах эмтэниэн сөбүй? Бу туһунан айылҕаттан айдарыылаах норуот эмчититтэн туоһуластыбыт. Юлия Юрьевна Николаева – норуот эмчитэ, “Арчы дьиэтин” иһинэн үлэлиир өбүгэ үгэһин, сиэрин-туомун дьоҥҥо тарҕатар,...
Тааттаҕа музей тэриллиитэ
Куорат олоҕо | 14.05.2022 | 15:00
Тааттаҕа музей тэриллиитэ
Кэлэр сэрэдэҕэ, ыам ыйын 18 күнүгэр, аан дойдуга Музей күнэ бэлиэтэнэр. Быйыл Таатта улууһугар кыраайы үөрэтэр музей тэриллибитэ 77 сыла.   Музей тэриллиитэ норуодунай худуоһунньук И.В. Попов аатын кытта ыкса ситимнээх. Дэгиттэр дьоҕурдаах, хас да экспедицияҕа сылдьыбыт (бастакы Сибиряковскай экспедиция 1894-96 сс.), баай матырыйаалы муспут буолан да буолуо, 1938 с. саҕалаан...
Похуоттуу бардыбыт!
Сынньалаңңа | 14.05.2022 | 15:33
Похуоттуу бардыбыт!
Бу күннэргэ дьиэ кэргэнинэн, кылааһынан похуоттар саҕаланыахтара. Үчүгэй сынньалаҥы көрдөөх бырагыраама киэргэтэр. Сөбүлэһэҕит? Оччоҕуна “Киин куорат” бэлэмнээбит оонньууларын сэргээҥ, сэҥээриҥ!    Хамсаныылаах оонньуулар «Светофор» Хонууга эбэтэр балаһааккаҕа оонньонор. Онно икки уһун сурааһыны тардаҕыт. Бастакы сурааһын кэннигэр кыттааччылар оонньуу саҕаланыытыгар тураллар. Оттон иккис сурааһыҥҥа диэри ыытааччыттан (эккирэтэр киһи) куотан тиийиэхтээхтэр. Бастаан ыытааччыны...